29 сентября 2014 г.
Форума хутшăнакансем валли культура мероприятийĕсемпе экскурсисем йĕркелĕç, пурте спорт форми тăхăнĕç. Çак ыйтусене пăхса тухнă "Раççей _ спорт çĕр-шывĕ" форума тата Раççей Президенчĕ çумĕнчи Физкультурăпа спорта аталантарас енĕпе ĕçлекен канаш ларăвне хатĕрленсе ирттерес енĕпе ĕçлекен республикăри йĕркелỹ комитечĕн ларăвĕнче. Октябрĕн 9-мĕшĕнче Шупашкарти Хĕрлĕ тỹремре хула çыннисем "Спорт _ пурин валли те" уява хутшăнма пултарĕç. Унта спортсменсем, артистсем, чи лайăх пултарулăх ушкăнĕсем хăйсен ăсталăхĕпе паллаштарĕç. Октябрĕн 8-11-мĕшĕсенче форума хутшăнакансем валли театрсенче, концерт залĕсенче тỹлевсĕрех спектакльсем, концертсем кăтартĕç, музейсене те тỹлевсĕрех йышăнĕç. Ăмăртусем Шупашкарти "Энергия", "Труд" стадионсенче тата Юрă уйĕнче иртĕç. Тĕп хула администрацийĕ спорт форумне хутшăнакансем валли 15000 калпакпа шарф хатĕрленĕ. Информполитика министрĕ Валентина Андреева пĕлтернĕ тăрăх _ мероприяти вăхăтĕнче журналистсем те хăйсем йышăннă пĕрешкел тумпа пулĕç, чăваш наци палли пирки те манмĕç. Хăнасем валли Чăваш Республики çинчен буклет та хатĕрлеççĕ. Раççейре пĕрремĕш хут _ Пĕтĕм тĕнчери утакансен кунĕ "Раççей _ спорт çĕр-шывĕ" форума уçнă кун _ октябрĕн 9-мĕшĕнче _ Шупашкарта "ТАФИСА" Пĕтĕм тĕнчери утакансен кунĕ иртет. Пирĕн çĕр-шывра ку мероприяти пĕрремĕш хут пулать, унта Шупашкарта кăна 15 пин ытла çын хутшăнмалла. Пĕтĕм тĕнчери утакансен кунĕ _ Халăхсем хушшинчи "ТАФИСА" спорт ассоциацийĕн официаллă календарĕнчи паллă мероприяти. Ăна çынна сывлăхлă пулма пулăшакан чи ансат меле _ çуран утассине _ халăх хушшинче сарас тĕллевпе йĕркелеççĕ. Çулсерен асăннă акцие 150 çĕр-шыври 12 миллион ытла çын хутшăнать.
А.ВАСЮКОВА.