01 октября 2014 г.
- Паян районти пур ял тăрăхĕсенче Пĕтĕм тĕнчери ватă çынсен кунне паллă таваççĕ. Çавна май уяв концерчĕсем, тĕл пулусем, тĕрлĕ куравсем, спорт ăмăртăвĕсем иртеççĕ. Кун пек тĕл пулу ĕнер Березовкăри вăхăтлăх пурăнмалли çуртра пулнă. Кунти ватăсене районти пенсионерсен, ветерансен канашĕн ертỹçисем саламланă, Культурăпа кану центрĕн ĕçченĕсем юрă-ташăпа савăнтарнă.
- Ваттисен кунне халалласа районти халăх музейĕнче октябрĕн 5-мĕшĕччен Уçă алăксен кунĕ иртĕ. Пенсионерсем çак вăхăтра музейри экспонатсемпе, çĕнĕ куравпа тỹлевсĕрех паллашма пултараççĕ.
- "Коминтерн" ЯХПК ĕçченĕсем 220 гектар йышăнакан кукуруз уйĕнче тăрăшаççĕ. Кукурузăна нумаях пулмасть туяннă комбайнпа пухса илеççĕ. Уйран ăна силоса хывма тăватă техника турттарать.
- Сентябрĕн 26-мĕшĕнчен республикăра кĕрхи призыва йĕркелес ĕçсем пуçланнă. Аса илтеретпĕр, республикăра çурхи призыв вăхăтĕнче комиссие 7434 çамрăка чĕннĕ. Вĕсенчен 99,3 проценчĕ палăртнă вырăна вăхăтра çитнĕ. 49-шĕ комиссие сăлтавсăрах пыман. Çавăн пекех çак тапхăрта çара тăрассинчен пăрăнса юлнă 456 гражданина шыраса тупнă. 37 таркăн пирки уголовлă ĕç пуçарнă, 51-шне административлă явап тыттарнă.
А.ЗАМУТКИНА.