06 октября 2014 г.
Кăçал "Свобода" колхоз 345 гектар лаптăк çинче тыр-пул тухăçлă çитĕнтерсе илнĕ. Пĕрчĕллĕ тата пăрçа йышши культурăсене пухса кĕртнĕ çĕрте Иван Бурин, Леонид Давыдов комбайнерсем тата вĕсене пулăшаканĕсем Петр Буринпа Нина Андреева вăй хунă. Вырнă тырра Сергей Никитин автомашинăпа йĕтем çине турттарса тăнă. Тыр-пул тухăçĕ, чăнах та, савăнтарать: кашни гектартан _ 30 центнер ытла. Кун пек кăтарту районти нихăш хуçалăхăн та çук. Юлашки вăхăтра йĕтем çинче колхозниксен пĕр бригади (унăн йышĕнче Полина Скворцова, Алевтина Порфирьева, Алевтина Григорьева, Юрий Максимов тата ыттисем) юлашки тырра кĕлете тасатса кĕртес тĕллевпе тимленĕ. Сортировка тăвакан агрегата Станислав Терентьев тикĕс ĕçлеттернĕ. Колхоз ертỹçи Валерьян Бромбин пĕлтернĕ тăрăх, çак кунсенчех 45 гектар йышăннă кукурузăна та тирпейлесе кĕртнĕ. Ку паха ял хуçалăх культурине ферма çывăхĕнчи икĕ траншейăна 400 тонна хывнă. Ку ĕçре Александр Токарев, Владимир Терентьев, Ильяпа Федор Петровсем тăрăшулăх кăтартнă. Çапла, уй-хир пушаннă темелле. Халĕ колхоз механизаторĕсем кĕрхи çĕртме тăваççĕ.
Геннадий САВЕЛЬЕВ.