06 октября 2014 г.
Апрель уйăхĕн 14-мĕшĕнче 11 сехетре районти полици уйрăмне Хĕрлĕ Чутайри тỹлев терминалĕсем урлă укçа вăрлани пирки шăнкăравласа пĕлтерчĕç. Тĕпчевпе оперативлă служба çийĕнчех преступлени тунă вырăна çитрĕ, икĕ çамрăк арçынна тытса чарчĕ. Вĕсем район çыннисем мар иккен: пĕри _ Мускавран, тепри _ Абхази Республикинчен. Ют çĕртен килнĕ арçынсем район территорине арендăна тытнă "Нисан" маркăллă машинăпа çитнĕ-мĕн. Следстви çакна кăтартрĕ: кăçалхи апрель уйăхĕн 14-мĕшĕнче ирхи 7.47-9.02 сехетсенче ют çĕртен килнĕ О. гражданин К. юлташĕпе канашласа, пĕр-пĕрин хушшинче рольсене уйăрса, пуяс шутпа ют пурлăха хапсăнас тенĕ. Çак тĕллевпе Хĕрлĕ Чутайри Çĕнтерỹ лапамĕнчи лавккана (Хĕрлĕ Чутай райповĕн суту-илỹ центрĕнче вырнаçнă) кĕрсе В. уйрăм предпринимателĕн харпăрлăхĕнчи тỹлев терминалне çаратма шутланă. Вăрăсем 1000 тенкĕлĕх купюра çумне скотчпа леска çирĕплетсе ăна темиçе хутчен терминала чиксе 16000 тенкĕ тупăш туса пухнă суммăна саккуна пăсса абонент номерĕ çине куçарнă. Вĕсенчен пĕри купюрăна йышăнакан хатĕртен укçа хунă тата кăларнă вăхăтра тепри терминала хăйĕн кĕлеткипе картласа тăнă, хушăран ролĕсемпе ылмашăннă. Çапла иртсе çỹрекен çынсем преступлени тунă пирки шутламан та. Асăннă çынсемех хăйсен преступлениллĕ ĕçне тăсас тенĕ. Те пухнă укçа-тенкĕ çителĕксĕр пулнă? Çак кунах 9.17-10.20 сехетсенче Хĕрлĕ Чутайри Çĕнтерỹ лапамĕнчи 9 "а" çуртри пĕрремĕш хутра вырнаçнă терминала (вăл В. уйрăм предпринимателĕн харпăрлăхĕнче шутланать) çаратнă: кивĕ мелпех усă курса 11000 тенке икĕ абонент номерĕ çине куçарнă. Çапла ют çĕртен килнĕ граждансем В. предпринимателе 27000 тенкĕсĕр хăварнă. Преступленисене çийĕнчех уçма пĕр арçынпа çамрăк хĕрарăм тимлĕ пулни пулăшрĕ. Вĕсем терминал умĕнче ют арçынсем нумай вăхăт тăнине асăрханă. Çавăн пекех хĕрарăм вĕсене вăрттăн сăнанă, автомобиль номерне çырса юлнă. Тăкак тỹсекенни çийĕнчех преступлени пирки пĕлтерни те саккуна пăсакансене тытса чарма пулăшрĕ. Ют çĕртен килнĕ арçынсем хăйсен айăпне йышăнчĕç, тăкака туллин саплаштарчĕç. Çак преступленисене тăвиччен икĕ кун маларах вĕсенчен пĕри (О.) Шупашкар хулинчи "Экспресс" лавккара вырнаçнă тỹлев терминалĕ урлă укçа вăрлама тăни паллă пулчĕ. Анчах та ун чухне ĕçе вĕçне çитерме условисем пулман. Кун пек фактсем пуласран уйрăм предприниматель терминалсенче ятарлă программăсем вырнаçтарчĕ. Хальлĕхе уголовлă ĕçе суда ярса патăмăр. Çитес кунсенче ют çĕртен килнĕ гражданинсене айăплĕç.
Р.ПУДОВА, районти полици уйрăмĕн тĕпчев пайĕн аслă следователĕ.