08 октября 2014 г.
Октябрь уйăхĕн пуçламăшĕнче районта темиçе савăнăçлă мероприяти пулса иртрĕ. Вăл шутра _ Атнар тата Мăн Этмен шкулĕсен спорт залĕсене тĕпрен юсанă хыççăн савăнăçлă майпа уçни. Асăннă шкулта вĕренекенсен ĕмĕчĕ "Единая Россия" партин "Ача-пăча спорчĕ" проектне пула пурнăçланнă. Вĕренỹ учрежденийĕсене юсав ĕçĕсем ирттерме кашнине 820 пин тенкĕ тата спорт хатĕрĕсемпе тивĕçтерме 18 пин те 884 тенкĕ уйăрнă. Сăмах май, асăннă проект çак партин пуçарулăхне пула çĕр-шывăн 45 субъектĕнче ăнăçлă пурнăçа кĕрет. Çĕнелнĕ спорт залĕсене уçнă çĕре ЧР Тĕрĕслевпе шутлав палатин председателĕ Татьяна Минина, ЧР Патшалăх Канашĕн строительство, вырăнти хăй тытăмлăх, Регламент тата депутатсен этикин Комитечĕн председателĕ Николай Малов, ЧР Патшалăх Канашĕн депутачĕ Валерий Павлов, район пуçлăхĕ Александр Степанов, район администрацийĕн пуçлăхĕ Александр Башкиров тата ыттисем хутшăннă. Хальхи йышши çĕнĕ спортзал спорта шкул шайĕнче аталантарма çĕнĕ туртăм парать. Малашне кунта физкультура урокĕсем тивĕçлĕ шайра иртесси иккĕлентермест. Мăн Этменти тата Атнарти шкул ачисем спорт залĕсемпе кăмăллă пулнине пĕлтерсе проекта пурнăçлакансене тав тунă, хăйсен пултарулăхĕпе паллаштарнă. Унтан çĕнĕ спорт залĕсенче волейбол командисем юлташла тĕл пулнă. Палăртмалла, спортзал уçассипе çыхăннă мероприяти уйрăмах Атнар шкулĕнче çỹллĕ шайра иртнĕ.
Александр БАШКИРОВ, район администрацийĕн пуçлăхĕ:
- Ачасене спорта явăçтарасси шкул спорт залĕсенчи условисенчен нумай килет. Çакна тĕпе хурса "Единая Россия" парти яллă вырăнсенче вырнаçнă вĕренỹ учрежденийĕсене çỹрекенсене физкультурăпа тата спортпа туслă пулма майсем туса парас тĕллевпе тĕрлĕ ĕçсем пурнăçа кĕртме тăрăшать. Çакăн пек хăтлă та çутă, хальхи йышши спортзал пулнишĕн чи малтанах çак партие тав сăмахĕ каламалла. Ĕçсем кунпах вĕçленмеççĕ: Çĕн Атикасси шкулĕн спортзалне те проектпа килĕшỹллĕн юсама палăртнă. Спорт залĕсем шкул ачисемшĕн те, вĕрентекенсемшĕн те, уйрăмах спортсменсемшĕн, лайăх. Вĕсем пуласлăхра хăйсен çитĕнĕвĕсемпе савăнтарасса шанатăп.
Сергей КУДРЯШОВ, Атнарти пĕтĕмĕшле пĕлỹ паракан вăтам шкул директорĕ:
- Чăнах та, "Единая Россия" партин "Ача-пăча спорчĕ" проекчĕпе килĕшỹллĕн кăçал пирĕн шкулăн спортзалĕ тĕпрен улшăнчĕ. Халĕ кунта ачасене валли хывăнса тăхăнмалли, çăвăнмалли пỹлĕмсем, туалет пур. Ачасем те, вĕренекенсем те, ашшĕ-амăшĕ те çакăнпа кăмăллă. Уйăрса панă укçа-тенкĕпе юсав ĕçĕсем ирттернипе пĕрлех спорт хатĕрĕсемпе оборудовани те туянтăмăр. Сăмах май, шкулта физкультура урокĕсене пысăк опытлă физкультура учителĕ Иван Иванов ертсе пырать. Унсăр пуçне районти физкультурăпа спорт комплексĕн тренерĕсем Михаил Никитинпа Николай Судаков волейбол тата футбол секцийĕсене çỹрекенсемпе ĕçлеççĕ. Çитĕнỹсем те пур, командăсем район шайĕнчи ăмăртусенче мала тухса савăнтараççĕ.
Альбина ЗАМУТКИНА хатĕрленĕ.