13 октября 2014 г.
Октябрĕн 9-мĕшĕнче Шупашкарта Пĕтĕм тĕнчери V "Раççей _ спорт çĕр-шывĕ" форум уçăлнă. Виçĕ куна пыракан форума хутшăнма таçтан та хăнасем килсе çитнĕ. Вăл шутра Раççей Правительствин членĕсем, федерацин тата регионсен власть органĕсен ертỹçисем, Пĕтĕм тĕнчери тата Раççейри спорт пĕрлешĕвĕсене ертсе пыракансем, ĕçлĕ çынсем. Тĕп мероприятисем Шупашкарпа Çĕнĕ Шупашкар хулисенче пынă."Раççей _ спорт çĕр-шывĕ" форума Владимир Путин хутшăннă. Унта хускатнă тĕп ыйтусем: спорт резервне хатĕрлесси, Раççейре спортăн пысăк ăмăртăвĕсене йĕркелесси. Форума Раççейри тата тĕнчери 20 çĕр-шыври физкультурăпа спортăн 2 пин ытла специалисчĕ хутшăннă.
Форум зарядкăран пуçланнă
Шупашкарсемпе зарядкăна Раççей телекуравĕн паллă, сумлă спорт комментаторĕсенчен пĕри Дмитрий Губерниев ирттернĕ. Вăлах Спортсменсен парадне ертсе пынă. Парада Олимп, тĕнче тата Раççей чемпионĕсем хутшăннă. Вĕсем Раççей Федерацийĕн, Чăваш Ен тата Шупашкар хулин ялавĕсене йăтса иртнĕ. Пĕтĕм тĕнчери утакансен кунĕ, Шупашкарпа пĕр харăсах, Раççейри темиçе хулара старт илнĕ. Çак кун Шупашкар заливĕн çыранĕ тăрăх пин-пин çын утса çаврăннă.
Владимир Путин: "Чăваш Республики _ спорт енĕпе кăтартуллă регион"
Владимир Путин Çĕнĕ Шупашкарти "Сокол" Пăр керменĕнче иртнĕ "Спортри пĕрлĕхре _ тĕнче тăнăçлăхĕ: пĕтĕм ĕçсен стратегийĕ" пленарлă ларăва хутшăннă. Ăна Раççей Федерацийĕн спорт министрĕ Виталий Мутко ертсе пынă.
Ларăва хутшăнакансен шутĕнче РФ Правительствин Председателĕн çумĕ Аркадий Дворкович, Пĕрлешнĕ нацисен организацийĕн (ООН) Генеральнăй секретарĕн спорт ыйтăвĕсемпе ĕçлекен пулăшуçи Вильфред Лемке, студентсен Пĕтĕм тĕнчери Союзĕн президенчĕ Код Луи Гацен, "Спорт-Акконд" пĕтĕм тĕнчери спорт организацийĕн президенчĕ Мариус Визер, РФ Патшалăх Думин Председателĕн пĕрремĕш çумĕ, Раççей Олимп комитечĕн президенчĕ Александр Жуков, Олимп вăййисен тата тĕнче чемпионĕсем _ РФ Патшалăх Думин депутачĕ, Раççей Геройĕ Александр Карелин, Олег Саитов, Александр Попов, Татьяна Казанкина, Александр Сальников, ытти çăлтăрсемпе тĕнчери тата çĕр-шыври спорт федерацийĕсен ертỹçисемпе паллă тренерсем.
Форума хутшăнакансене Раççей Президенчĕ Владимир Путин саламланă.
_Паян Шупашкарта физкультурăпа спорта аталантарас ыйтусемпе Пĕтĕм Раççейри V форума уçрăмăр. Пирĕн çĕр-шывПĕтĕм тĕнчери спорта аталантарас тĕлĕшпе сулмаклă вырăн йышăнать. Спортри ăсталăха ỹстерессипе тата кашни регионтах физкультурăпа спортра массăллăха малалла аталантарассипе нумай курăмлă ĕçлетпĕр. Эпĕ шанатăп, хамăр çĕнсе илнĕ позицие тата çỹллĕрех шая çĕклĕпĕр, _ тенĕ Владимир Владимирович.
Владимир Путин ларура Чăваш Республикин Пуçлăхне Михаил Игнатьева республикăра физкультурăпа спорта аталантарассине пысăк тимлĕх уйăрнăшăн тав тунă. Раççей Президенчĕ Владимир Путин, спорт министрĕ Виталий Мутко, Атăлçи федераци округĕн полномочиллĕ Представителĕ Михаил Бабич тата республика Пуçлăхĕ Михаил Игнатьев ĕçлĕ çул çỹревпе Çĕнĕ Шупашкарти олимп резервĕн çамрăксемпе ачасен 3-мĕш спорт шкулĕн çăмăл атлетика манежне çитсе курнă, çĕр-шывăн çамрăксен пĕрлештернĕ командипе тĕл пулнă.
Пирĕн корреспондент Алина Карпова ĕнер Шупашкарта пулчĕ, "Раççей _ спорт çĕр-шывĕ" форум шайĕнче иртнĕ "Спорт резервне хатĕрлемелли тытăм: хальхи лару-тăру тата приоритетлă аталану енĕсем" конференци ĕçне хутшăнчĕ. Ачасемпе çамрăксен пултарулăх керменĕнче иртнĕ конференцие Раççей спорт министрĕн çумĕ Юрий Нагорных тата регионсенчи спорт аталанăвĕшĕн яваплă çынсем килсе çитнĕ. Пирĕн корреспондент вĕсенчен пĕринпе тĕл пулса калаçнă. Çавăн пекех Алина Карпова Раççей спорт министрĕ Виталий Мутко хутшăннипе иртнĕ мероприятисене хутшăннă. (Кун пирки тĕплĕнрех _ çитес номерте).