22 октября 2014 г.
Октябрĕн 17-мĕшĕнче пăрлă çумăр тата йĕпе юр çунине пула республикăри чылай районта, çав шутра пирĕн патра та, электроэнергипе тивĕçтерекен линисем татăлса пĕтрĕç, çынсем çутăсăр тăрса юлчĕç. Республика правительстви лару-тăрăва сăнаса-тĕрĕслесех тăчĕ, октябрĕн 19-мĕшĕнче республика Пуçлăхĕ Михаил Игнатьев Чăваш Енре регион шайĕнчи чрезвычайлă лару-тăру режимне туса хуни çинчен йышăну кăларчĕ. Районта çут çанталăк пулăмĕсемпе çыхăннă кăлтăксене пĕтерессипе ятарлă бригадăсем ĕçлерĕç. Пăрлă çумăра пула 33 ял электричествăсăр юлчĕ. Юсав ĕçĕсенче 7 бригада тимлерĕ, çавăн пекех Мордови Республикинчен те пулăшу çитрĕ. Электриксем тăрăшса тимленĕрен октябрĕн 19-мĕшĕ тĕлне чылай çĕрте çутă пачĕç, 18 ялти хăш-пĕр урамсенче юсав ĕçĕсем малалла пычĕç. Октябрĕн 20-21-мĕшĕсенче район администрацийĕн пуçлăхĕ Александр Башкиров çут çанталăк пăтăрмахне пула çутăсăр юлнă ялсене çитсе курчĕ, унта юсав ĕçĕсем мĕнлерех пынипе паллашрĕ. Октябрĕн 21-мĕшĕнче 15 сехет тĕлне 29 яла çутăпа туллин тивĕçтернĕ. Тăватă ялта: Хăмарккара _ 10 çурт, Турханта _ 12, Штанашра _ 10, Арайкассинче 31 çурт асăннă вăхăт тĕлне çутăсăр пулнă. Кунта юсав ĕçĕсем чарăнса ларман, вĕсене талăк хушшинче вĕçлеме йышăннă. Палăртмалла, электриксемпе пĕрлех çут çанталăк пулăмĕсемпе çыхăннă кăлтăксене пĕтерес ĕçе районта пурăнакансем те хутшăнчĕç, пралуксем çинчи пăра катрĕç, хуçăлса-тăкăнса пĕтнĕ йывăç тураттисене пуçтарса тирпейлерĕç.
Валерий ЖИГАНОВ, райадминистрацин ятарлă программăсен пай начальникĕ.