25 октября 2014 г.
Кăçалхи июлĕн 1-мĕшĕнчен пуçласа августăн 15-мĕшĕччен Пĕтĕм Раççейри "Раççей аллейи" акципе килĕшỹллĕн республикăра та çак ятпах фотоконкурс иртнĕ. Ăна ЧР Çут çанталăк ресурсĕсен тата экологи министерствин "Чăваш Республикинчи уйрăм сыхланакан çут çанталăк территорийĕсен тата объекчĕсен дирекцийĕ" хысна учрежденийĕ йĕркеленĕ. Конкурса Чăваш Енĕн символĕ пулма тивĕçлĕ ỹсен-тăран сăн ỹкерчĕкĕсене йышăннă. Палăртма кăмăллă, асăннă фотоконкурсра Тумликассинче пурăнакан пирĕн ĕçтешĕн Алина Карпован сăн ỹкерчĕкĕ ("Нивяник обыкновенный") çĕнтернĕ. Маттур! Юлашки çулсенче вăл фотоискусствăна пысăк тимлĕх уйăрать, фотоконкурссене хутшăнса çитĕнỹсем тăвать. Алина Николаевнан аллинче тăтăшах фотоаппарат курма пулать. Вăл тавралăхри ахаль чухне куçа курăнман интереслĕ самантсене, пулăмсене ỹкерме ăста. Çак ĕçе вăл ятарласа ниçта та вĕренмен, апла пулин те унăн сăн ỹкерчĕкĕсем чăн-чăн фотографăн пекех: куракана илемĕпе, содержанийĕпе, хăйне евĕрлĕхĕпе тыткăнлаççĕ. Алина Карпована черетлĕ çĕнтерỹпе саламлатпăр!
А.ЗАМУТКИНА.