29 октября 2014 г.
Эпир 1500 гектар лаптăк çĕрпе ĕçлетпĕр. Пĕрчĕллĕ тата пăрçа йышши культурăсем кăçал 900 гектар йышăнчĕç. Çак лаптăкран пĕтĕмпе 1530 тонна тĕш тырă пуçтарса илтĕмĕр. Вăтам тухăç 17,5 центнерпа танлашрĕ. Çав хушăрах 300 гектар таса пусă валли уйăртăмăр.
"Иккĕмĕш çăкăра" виçĕ гектар çĕр çинче ỹстертĕмĕр. Кашни гектартан 187,0 центнер çĕр улми илтĕмĕр. Кĕрхи çĕртмене август уйăхĕнчех вĕçлерĕмĕр. Кĕр акинче пĕрремĕш репродукциллĕ "Московская 56" тулă сортне 437 гектар акса хăвартăмăр. Калчасем лайăх шăтса тухнине палăртмалла. Çур акинче 400 гектар çурхи тулă, 100 гектар урпа акма палăртатпăр.
Хуçалăха ỹсен-тăран отраслĕпех аталантарса пыма йывăр. Акă кăçал 38 пин бройлер чăх тата 10 пин кăвакал чĕпписем ỹстерсе халăха сутрăмăр. Ку енĕпе малалла та ĕçлес шухăш пур, чĕпĕсем ỹстермелли цехсене Пантьăкра ултта çитересшĕн, Туканашра çăмарта тăвакан бройлерсен цехне уçасшăн. Çавăн пекех мăйракаллă шултра выльăх, ĕнесем тытас тĕллев те пур. 400 пуç ĕне валли ферма тăвасси канăç памасть. Ферма тумашкăн проект хатĕрлерĕмĕр ĕнтĕ. Строительство ĕçне кĕркунне тытăнасси пулмарĕ, çуркунне ĕçе пуçăнса тĕллеве пурнăçа кĕртсен хуçалăх сĕт сутса услам илме пултарасса шанатпăр.
Çапла, ĕмĕтсем пысăк, анчах аталанма чăрмантаракан сăлтавсем те сахал мар. Иртнĕ çул, ав, ултă миллион тенкĕпе комбайн туянтăмăр. Уншăн кашни уйăхра кивçен 120 пин тенке тавăрмалла. Комбайнпа вара пĕр ĕç тапхăрĕнче кăна усă куратпăр. Çавăнпа хресчене, ман шутпа, ура çине çирĕп тăма паян çăмăлах мар. Апла пулин те малаллах талпăнатпăр, йывăрлăхран тухмалли çул-йĕр шыратпăр.
Николай ЛИСАЕВ, уйрăм предприниматель - фермер хуçалăхĕн ертỹçи.