29 октября 2014 г.
Театр этем чĕрине витерме пултаракан асамлă тĕнче пулнине октябрĕн 27-мĕшĕнче тепĕр хут курса ĕнентĕм. Районта пиллĕк-мĕш хут иртнĕ театр пултарулăхĕн "Асамлă чаршав" фестивальне савăнăçлă лару-тăрура хупнă уяв каçĕ пур кураканăн чунне те витерчĕ пулĕ.
Сăмах май, çав каç Культурăпа кану центрĕн залне куракансем чылай пухăннăччĕ.Палăртас килет, уяв каçĕ мĕн вĕçне çитиччен куракансем сцена çинчи артистсемпе пĕрле пулни, вĕсем хăйсен сăмахне каласа пĕтермесĕр залран тухса кайманни савăнтарчĕ. Кун пеккине эпĕ, тен, пĕрремĕш хут куратăп пулĕ. Малтан районти артистсем, унтан Константин Иванов ячĕпе хисепленекен Чăваш патшалăх академи драма театрĕн артисчĕсем куракансене хăйсен пултарулăхĕпе чăннипех тыткăнларĕç.
Уяв каçĕнче Шупашкарти драма театрĕн артисчĕсем хăйсен ĕçтешĕсене _ пирĕн районта çуралса ỹснĕ, Чăваш патшалăх академи драма театрĕнче вылянă, çамрăклах пурнăçран уйрăлнă Ирина Садовниковапа Николай Булаткина аса илчĕç. Раççей тата Чăваш Республикин халăх артистки Нина Яковлева, Чăваш Республикин тава тивĕçлĕ артисчĕ Петр Садовников районти халăх музейне Ирина Садовникова "Праски кинеми мăнукне авлантарать" спектакльте Алина рольне калăпланă вăхăтра сцена çине тухнă кĕпине парнелерĕç. Унтан Ирина Садовникова çав спектакльте юрланă "Лантăшсем" юрă янăрарĕ. Сцена çинчи артистсен те, пĕр харăс ура çине тăнă куракансен те куçĕсем куççульпе тулчĕç...
Алина КАРПОВА.