29 октября 2014 г.
Раççей Федерацийĕн Вĕренỹпе ăслăлăх министерстви шкул ачисемпе студентсем хушшинче наркотик хатĕрĕсемпе тата психотроплă япаласемпе усă курнине малтанхи тапхăртах тупса палăртас тĕллевпе тĕрĕслемелли йĕрке çирĕплетнĕ. Унпа килĕшỹллĕн, тĕрĕслев ирĕклĕ йĕркепе иртет. 15 çултан кĕçĕнреххисемшĕн вĕсен ашшĕ-амăшĕ килĕшỹ парать, ăна çырупа çирĕплетет. 15 çултан аслăраххисем çак ыйтăва хăйсем тĕллĕн татаççĕ. Тестирование ятарлă комисси ирттерет. Анкетăсене алă пусмаççĕ (анонимлă майпа иртет), анчах та унта вĕренỹ учрежденине кăтартаççĕ. Унсăр пуçне вĕренекен хăйĕн çулне, анкетăна хăçан тултарнине кăтартма тивĕç. Тестировани пынă вăхăтра аудиторие ачасен ашшĕ-амăшĕ те пыраять. Кун пек ирĕк пур. Анчах та тестировани пынă вăхăтра ачасен пĕр-пĕринпе канашлама юрамасть. Çавăн пекех вĕренекен ыйтусем çине хуравлама килĕшмесен çакăн пирки комисси членне пĕлтерме пултарать. Унтан аудиторирен тухма та ирĕк пур. РФ субъекчĕсен ĕç тăвакан власть органĕсем (вĕренỹ сферинчисем) ĕçсене 30 кун хушши тишкереççĕ. Унтан вĕсене регионти Сывлăх сыхлавĕн министерствине яраççĕ. Вăл вара тĕрĕслеве пĕтĕмлетсе профилактика енĕпе хушма мерăсем йышăнать.
Валерий ШОРКИН, район прокурорĕ.