08 ноября 2014 г.
Халăхсен пĕрлĕхĕ _ чи пысăк пуянлăх. Республикăри хуласемпе район центрĕсенче ноябрĕн 4-мĕшĕнче Халăх пĕрлĕхĕн кунне халалланă мероприятисем савăнăçлă лару-тăрура иртнĕ. Тĕп уяв вара Шупашкарти Хĕрлĕ тỹремре пулнă, унта республика Пуçлăхĕ Михаил Игнатьев та хутшăннă. Митинга пурĕ 10 пин çын пухăннă.
Çав кунах Михаил Игнатьев "Чăваш Республикинчи халăхсен этнокультура аталанăвĕ" çавра сĕтел ĕçне хутшăннă. Унта сăмах Раççейри халăхсем туслă пурăнни, пĕр-пĕрне пулăшни пирки пынă.
Преми укçи _ ача сачĕ валли. Октябрĕн 30-мĕшĕнче Раççей Федерацийĕн Правительствин ларăвĕ иртнĕ, унта бюджетсен хушшинчи трансфертсен мелĕпе ĕç тăвакан влаçăн вырăнти органĕсен 2013 çулхи ĕç-хĕлĕн тухăçлăхне хакланине тĕпе хурса Раççейĕн 20 субъекчĕ хушшинче грантсем валеçнĕ. РФ Правительстви хакланă тăрăх _ Чăваш Республикин пĕтĕмĕшле рейтингра 14-мĕш вырăн йышăннă, куншăн 165 млн та 59 пин тенкĕлĕх гранта тивĕçнĕ.
Ноябрĕн 1-мĕшĕнче вырăнти хăй тытăмлăх ертỹçисемпе канашлу ирттернĕ май Чăваш Ен Пуçлăхĕ Михаил Игнатьев ЧР Министрсен Кабинечĕ тухăçлă ĕçĕшĕн илнĕ федераци укçине Шупашкарти микрорайонсенчен пĕринче ача сачĕ тума ярассине пĕлтернĕ.
Ĕçсĕррисен хисепĕ пĕчĕкленнĕ. Чăваш Енре ĕçсĕррисен хисепĕ çулталăк пуçланнăранпа 17,8 процент чухлĕ пĕчĕкленнĕ. Çакăн пирки пĕлтернĕ ноябрĕн 5-мĕшĕнче республикăн халăха ĕçпе тивĕçтерекен патшалăх службин ертỹçи Сергей Димитриев ЧР Правительство членĕсемпе иртнĕ канашлура.
Халăха ĕçпе тивĕçтерме пулăшас тĕллевпе кăçал 469,4 млн тенкĕ тăкаклама палăртнă. Ĕçпе тивĕçтерекен служба ĕçченĕсем 36680 çынна ĕç тупма пулăшнă. Хевтесĕррисене тата çул çитмен çамрăксене ĕçе вырнаçтарасси те республикăра аван пулса пырать.
А.КАРПОВА хатĕрленĕ.