Публикации » Предпринимательсем улталаççĕ

08 ноября 2014 г.

Етĕрнери районсем хушшинчи следстви пайĕ уйрăм предприниматель тĕлĕшпе уçнă уголовлă ĕçе тишкерчĕ. Асăннă предприниматель районти хресченпе фермер хуçалăхĕн ертỹçи шутланса тăрать. Ăна РФ УК-ан 159.2 статйин 3-мĕш пайĕпе (укçа-тенкĕ илнĕ чухне ултавлă ĕçсем тунăшăн) айăплаççĕ. Ĕç-пуç çапларах пулнă: 2014 çулхи январь уйăхĕнче асăннă предприниматель районти халăха ĕçпе тивĕçтерекен центрпа хăйĕн хуçалăхне пĕр инвалида ĕçе вырнаçтаратăп тесе килĕшỹ тунă. Унпа килĕшỹллĕн предпринимателĕн инвалид валли ятарлă ĕç вырăнĕ йĕркелемелле пулнă. Ĕçпе тивĕçтерекен центр вара пур тăкаксене те саплаштарма килĕшнĕ. Унтан хресченпе фермер хуçалăхĕн ертỹçи центра тăкаксем пирки суя документсем тăратнă, патшалăха улталама шутланă. Центр сотрудникĕсем вара вăл ĕçе тивĕçлĕ пурнăçланă тесе унăн счечĕ çине пысăк сумма куçарнă. Çапла асăннă гражданин республика бюджетне 69,5 пин тенкĕлĕх тăкак кỹнĕ. Уголовлă ĕçе суда ярса панă. Ăна Етĕрне районĕн сучĕ пăхса тухрĕ. Айăплав паллă. Хальлĕхе вăл вăя кĕмен. Етĕрнери следстви комитечĕ.