Публикации » Артем - республика чемпионĕ!

08 ноября 2014 г.

Ноябрĕн 1-2-мĕшĕсенче Çĕнĕ Шупашкарта шахматла хăвăрт выляс енĕпе иртнĕ республикăри ăмăртăва 12 çул тултарман çамрăксем хутшăнчĕç. Асăннă турнирта Хĕрлĕ Чутай шкулĕнче вĕренекен Артем Чеченешкин (тренер-преподавателĕ Евгений Сергеев) хăйĕн ăсталăхне кăтартрĕ. Вăл республикăри 37 яш хушшинче ылтăн медале тивĕçрĕ. Турнирăн пĕрремĕш кунне арçын ача виççĕмĕш вырăнта пычĕ. Ăмăртусен иккĕмĕш кунне вара Артем конкурентсене хыçала хăварма пултарчĕ, малти вырăна йышăнчĕ. Аса илтеретпĕр, иртнĕ çул та Артем асăннă ăмăртăва хутшăннăччĕ, пьедесталăн виççĕмĕш картлашки çине тăнăччĕ. Шахмат вăййисемпе спорта кăмăллакансем валли "Хастар" физкультурăпа спорт комплексĕн алăкĕсем яланах уçă. Акă паян та кунта 14, 16, 18 çул тултарман яшсемпе хĕрсем хушшинче шахматла хăвăрт выляс енĕпе Чăваш Республикин ăмăртăвĕ иртет.

Аркадий ТУЙМАНОВ.