12 ноября 2014 г.
Ноябрĕн 8-мĕшĕнче районти "Хастар" физкультурăпа спорт комплексĕнче 14, 16, 18 çул тултарман яшсемпе пикесем хушшинче шахматла хăвăрт выляс енĕпе Чăваш Республикин ăмăртăвĕ иртрĕ. Турнира хутшăнакансене район администрацийĕн пуçлăхĕ Александр Башкиров, "Чăваш Республикин шахмат федерацийĕ" РОО-н председателĕ Михаил Мельник, ăмăртусен тĕп судйи Виктор Корнилов (Çĕнĕ Шупашкар), "Хастар" ФСК директорĕ Вячеслав Дадюков саламларĕç, çамрăксене ăнăçу сунчĕç. Пĕтĕмпе шахматçăсен турнирне республикăри 50 яхăн хĕрпе каччă хутшăнма кăмăл турĕ. Вĕсем Чутай çĕрĕ çине Шупашкартан, Çĕнĕ Шупашкартан, Çĕмĕрлерен тата Етĕрне, Канаш районĕсенчен килсе çитрĕç. Палăртмалла, асăннă ăмăртусенче хĕрлĕчутайсем виçĕ ылтăн, икĕ кĕмĕл тата тăватă пăхăр медале тивĕçрĕç. 14 çул тултарман çамрăксем хушшинче пьедесталăн çỹлти картлашки çине Елена Афанасьева (Хĕрлĕ Чутай) тăчĕ, иккĕмĕш _ Елизавета Чугунова (Çĕнĕ Шупашкар), виççĕмĕш _ Елена Гурьянова (Хĕрлĕ Чутай). 16 çул тултарманнисем хушшинче пĕрремĕш вырăна Çĕмĕрле пики Светлана Яндакова тухрĕ. Хĕрлĕ Чутай хĕрĕсем вара _ Анастасия Инжебейкинапа Виктория Сюткина _ пьедесталăн иккĕмĕшпе виççĕмĕш картлашки çине тăма пултарчĕç. 18 çул тултарман яшсемпе хĕрсем хушшинче хĕрлĕчутайсем самай палăрчĕç. "Ылтăна" Анастасия Григорьева тивĕçрĕ, "кĕмĕле" _ Дмитрий Афанасьев, "пăхăра" _ Вероника Егоровапа Дмитрий Максимов. 20 çул тултарманнисем хушшинче Карина Ефимова мала тухрĕ. Шахмат вăййисене кăмăллакансем ноябрĕн 29-мĕшĕнче те "Хастара" килме пултараççĕ. Çак кун арçынсем хушшинче шахматла выляс енĕпе район чемпионачĕ иртет.
Аркадий ТУЙМАНОВ, ăмăртусен тĕп секретарĕ.