12 ноября 2014 г.
Ноябрĕн 10-мĕшĕнче районти полици уйрăмĕнче ĕçлекенсем хăйсен професси уявне паллă турĕç, службăра палăрнисем медальсемпе хисеп хучĕсене тата тав çырăвĕсене тивĕçрĕç. Малтанах районти полици уйрăмĕн начальникĕ Александр Михопаркин уява пухăн- нисене саламлă телеграммăсемпе паллаштарчĕ. Унтан Çĕмĕрлери районсем хушшинчи шалти ĕçсен пайĕн начальникĕ Сергей Тарасов, районти полици уйрăмĕн начальник çумĕ Василий Белов, район администрацийĕн ĕçĕсен управляющийĕ Юрий Ямсков сăмах илчĕç, полици ĕçченĕсене професси уявĕпе саламларĕç. Вĕсем полицин обществăлла пурнăçри пĕлтерĕшĕ пысăк пулнине, сотрудниксем службăна тивĕçлĕ пурнăçланине палăртрĕç, профессие чунтан парăнса тăрăшнăшăн çамрăксене тата ветерансене тав турĕç. Чăваш Республикин Шалти ĕçсен министерствин хушăвĕпе килĕшỹллĕн шалти ĕçсен органĕсенче служба тивĕçне пурнăçлас тĕлĕшре тĕслĕх кăтартнăшăн, нумай çул тỹрĕ кăмăлпа ĕçленĕшĕн Раççей ШĔМ-ĕн 3-мĕш степеньлĕ медальне Эдуард Кондратьев следователь, службăра палăрнăшăн 1-мĕш степеньлĕ медале Роза Пудова полици следователĕ, Çул çỹрев хăрушсăрлăхĕн патшалăх инспекцийĕн инспекторĕ Алексей Илларионов, айăпланакансене вăхăтлăх тытакан изоляторăн хурал командирĕ Михаил Наумов тивĕçрĕç. Унсăр пуçне Людмила Албакова дознаватель, Сергей Герасимов участок уполномоченнăйĕ, çул çитмен çамрăксемпе ĕçлекен Надежда Краснова, Юрий Кондратьев оперативлă дежурнăй, Александр Митрофанов полици следователĕ, айăпланакансене вăхăтлăх тытакан изоляторăн хурал командирĕ Михаил Наумов, аслă участок уполномоченнăйĕ Игорь Серин, уголовлă шырав ушкăнĕн уполномоченнăйĕ Николай Стекольщиков район администрацийĕн Хисеп грамотине илме тивĕç пулчĕç. Ветерансене _ Николай Ямскова, Владимир Горшкова, Владимир Жукова, Сергей Антипова тата ыттисене _ Тав çырăвĕпе наградăларĕç. Спортпа туслă полици сотрудникĕсене райадминистрацин культурăпа спорт тата архив ĕçĕн пайĕн ертсе пыракан эксперт специалисчĕ Алексей Никитин саламларĕ, футбол тата волейбол вăййисенче палăрнисене Хисеп хучĕсемпе чысларĕ. А.ВАСЮКОВА.