15 ноября 2014 г.
Салтак атти тăхăнса курнă арçын яланах хисепре пулнă. Салтакра пулман _ саламат курман, тенĕ халăхра. Юлашки çулсенче çар сумĕ самаях чакрĕ. Шăпах çар чапне хăпартас тĕллевпе ĕнтĕ Раççейре 1992 çултанпа Призывник кунне ирттерме тытăннă. Вăл кĕрхи призыв кампанийĕпе пĕр килет.
Саккунпа килĕшỹллĕн Раççей Хĕç-пăшаллă Вăйĕсен службине тăма юрăхлă призывник шутне 18-27 çулсенчи арçын кĕрет. Раççейре çара çулталăкра икĕ тапхăрпа илеççĕ: çуркунне (апрелĕн 15-мĕшĕнчен пуçласа июлĕн 15-мĕшĕччен) тата кĕркунне (октябрĕн 1-мĕшĕнчен тытăнса декабрĕн 31-мĕшĕччен). Малтан çар тивĕçне икĕ çул пурнăçланă, халĕ, 2008 çултанпа, пĕр çул кăна.
- Салтаксене халĕ çар билечĕ вырăнне персоналлă электрон удостоверенисем параççĕ. Ун çинче призывникăн медицина, биографи тата професси тĕлĕшĕнчи хатĕрленĕвĕ çинчен пĕлтернисем пулаççĕ.
- Çартан пăрăнакансемпе кĕрешесси те çирĕпленнĕ. Тарса çỹрекенсем тĕлĕшпе чарусем хушăннă, вĕсемпе килĕшỹллĕн ун пек çын малашне патшалăх тата муниципаллă органсенче ĕçлеймĕ.
Икĕ эрне каялла районта Призывник кунне ирттернĕ. Унта савăнăçлă лару-тăрура районти 25 çамрăка çара кайма повестка панă. Палăртмалла, паянхи кун тĕлне повестка илнисенчен хăшĕ-пĕри çар ретне тăнă та ĕнтĕ. Кĕрхи призыв малалла пырать.
Техникум, колледж студенчĕсене тата профтехучилищĕре вĕренекенсене çара каяс срока каярах куçарса панă. Çакăн çинчен калакан саккун нумаях пулмасть "Раççей хаçатĕнче" пичетленсе тухнă. Унта çапла каланă: вĕренỹ сакки çинче ларакан çамрăксене çара илсе каймĕç. Кĕçĕн тата вăтам звенори пулас рабочисемпе специалистсене çулĕсене пăхмасăр салтака каймалли вăхăта каярах куçарса парĕç. Вĕсем вĕренсе тухсан кăна çара кайĕç.
Пĕртен-пĕр ăнлантарни: çĕнĕ призыв практики патшалăх аккредитацине илнĕ пуçламăш тата вăтам професси программипе куçăмлă майпа (очно) вĕренекен студентсене çеç пырса тивет. Çак норма 2017 çулхи январĕн 1-мĕшĕнчен ĕçлеме пуçлать. Каччăсене çак норма пырса тивет пулсан вĕсен вĕренĕве татмасăр пĕлỹ илме ирĕк пур. Хальхи студент-выпускниксем пирки мĕн калама пулать-ха? Вĕсене валли вăйра тăракан саккун салтак атти тăхăнассине каярах куçарассине пăхса хурать. Анчах çак норма пур вĕренекенсене лекмест. Вăл 20 çул тултариччен техникум, колледж тата профтехучилище пĕтернисене тивет.
Çартан таврăннă, военкомат повесткине пула вĕренсе пĕтереймен çамрăксем мĕн тăваççĕ-ха? Статистика çирĕплетет: пуçламăш тата вăтам професси пĕлĕвĕн тытăмĕнчи кашни виççĕмĕш студент çар хыççăн вĕренĕве малалла тăсмасть. Саккунри тỹрлетỹ вара вăтам професси пĕлĕвĕ паракан учрежденире куçăмлă майпа вĕренекен пур студента та вĕренсе пĕтерме ирĕк парать. Алла диплом илсен çеç каччă &¸ара кайĕ.
Раççей оборона министрĕн хушăвĕпе кăçалхи январĕн 1-мĕшĕнчен пуçласа 2015 çулхи январĕн 31-мĕшĕччен командир должноçĕсенче тăракан хăш-пĕр салтаксемпе сержантсене, енчен те вĕсем хăйсен тивĕçĕсене тỹрĕ кăмăлпа пурнăçлаççĕ пулсан, уйăхсерен 2 пин тенкĕ тỹлеççĕ. Тепĕр çĕнĕлĕх: салтакран киле таврăннă чух яшсене пĕр хутчен пособи тỹлеççĕ. Унăн виçи салтакăн чаçри должноçĕн икĕ оклачĕпе танлашать. Салтак тăлăх е ашшĕ-амăш хỹттисĕр юлнисен шутĕнчен-тăк _ пилĕк окладпа.
А.ЗАМУТКИНА хатĕрленĕ.
¸