19 ноября 2014 г.
Общественноçа пирус туртакансемпе кĕрешме чĕнес, усал йăлан сиенлĕхне халăха пĕлтерес енĕпе çулталăк календарĕнче икĕ кун палăртнă: майăн 31-мĕшĕ (Пĕтĕм тĕнчери пирус тĕтĕмĕсĕр кун) тата ноябрь уйăхĕн виççĕмĕш кĕçнерни кунĕ (Пĕтĕм тĕнчери пирус туртма пăрахмалли кун).
Çак çивĕч ыйтăвăн пĕлтерĕшне ăнланакансем унпа кĕрешмелли çул-йĕре хăйсем шутласа тупаççĕ. Акă "Свобода" колхоз правленийĕ пирус туртакансен шутне чакарас тĕллевпе туртма пăрахнă ĕçченсене темиçе çул укçа-тенкĕ хавхалантарăвĕ панă. Питĕ лайăх шухăш _ сывлăх та хавшамасть, кĕсьене хушма укçа та кĕрет. Тепĕр ырă тĕслĕх _ район администрацийĕнче ĕçлекен 63 çынтан паян виççĕшĕ кăна пируспа туслă. Апла пулсан, кĕрешни харама каймасть, пирус туртакансем чакни савăнтарать.
Статистика тăрăх, вилĕмсен 45 проценчĕ тỹрремĕнех пирус туртнипе çыхăннă. Çавăнпах халăха усал йăларан çăлас тесе патшалăх шайĕнче саккунсем йышăнаççĕ. Çак кунсенче Чăваш Республикин Правительствин ларăвĕнче çынсен сывлăхне табак сĕрĕмĕнчен сыхлас тĕлĕшпе мероприятисен планне тишкернĕ. Ăна Чăваш Ен Президенчĕн 2004 çулхи ноябрĕн 29-мĕшĕнчи "Пирус туртассин профилактики çинчен" тата 2010 çулхи майăн 31-мĕшĕнчи "Чăваш Республикинче табак туртнин профилактикипе çыхăннă хушма мерăсем çинчен" хушусене пурнăçласа хатĕрленĕ. Асăннă документа йышăнсан пирус туртассине республикăра тата хĕсмелле.
А.ДМИТРИЕВА.