Публикации » Пĕр арçыннăн "паттăрла" ĕçĕсем

22 ноября 2014 г.

Чăваш Республикин Шалти ĕçсен министерстви пĕлтернĕ тăрăх, пирĕн районта автомобильсене çаратнă çынна тытса чарнă. Ăна тытма арçын вăрă-хурахла ĕçсем тунине курнă район çыннисем пулăшнă. Пĕрремĕш хыпар Хĕрлĕ Чутай салинчи Çĕнĕ урамра пурăнаканран килнĕ _ çурт умне вăхăтлăха хăварнă грузовикран автомагнитолăн сенсорлă экранĕ çухалнă. Кỹршисем полици ĕçченĕсене хайхи машина умĕнче кăшт уксахлакан палламан арçынна курни çинчен пĕлтернĕ. Оперативлă ушкăн полицине таврăнма та ĕлкĕреймен _ палламан çынсем çăкăр турттаракан "УАЗ - 29051" машинăна вăрлани çинчен хыпар çитнĕ. Водитель машинăна тапратмалли çăра уççине кăларса илмен пулнă иккен, хăй вăхăтлăха район центрĕнчи лавккана çăкăр пама кĕнĕ пулнă. Усал шухăшлисем çакăнпа усă курнă та. Тата тем вăхăтран "Форд Транзит" маршрут автобусĕнчен автомагнитола çухални паллă пулнă. Водитель тимсĕрлĕхне пула _ микроавтобус алăкĕсем уçă юлнă _ хаклă япалана вăрланă. Анчах та автовокзал территорийĕнче пулнă пассажирсем автохурах пулма пултаракан çынна сăнласа панă. Çакă полицейскисене пулăшнă та. Часах вĕсем кăшт уксахлакан арçынна тытса чарнă. Унăн кĕсйисенче çухалнă "Сони" тата "Шатл" автомагнитолăсене тупнă. Кайрантарах çак этемех _ пĕрре кăна мар суд сакки çине ларнă, хальхи вăхăтра ниçта та ĕçлемен 44 çулхи Уйпуç арçынни _ çăкăр турттаракан машинăпа та ларса тарни паллă пулнă. Инçех те каяйман иккен хăй, автовокзал çывăхнелле çитсен машинăна пăрахса тарнă. Хальхи вăхăтра арçын тата мĕнле преступленисем тума пултарнине тĕрĕслеççĕ. А.СЕМЕНОВА.