22 ноября 2014 г.
Хура тула 90 тенкĕ парса туянмасан выçса вилетпĕр-ши? Юлашки кунсенче çĕр-шывра, çав шутра республикăра, районта тĕрлĕ апат-çимĕç хакĕсем ỹсни палăрчĕ. Сахăр самаях хакланни пирки калаçса пĕтереймерĕмĕр, кĕрпесем, уйрăмах хура тул, питĕ хакланни сисĕнчĕ. Районти лавккасенче хура тул кĕрпин хакĕ 60-90 (!) тенке çитрĕ. Тата ăна пули-пулми тупса илме те çук иккен. Тĕлĕнсе каймалла! Тин кăна 30 тенке яхăн тăнă кĕрпе хакĕ мĕн нушипе çавăн пекех ỹссе кайрĕ-ха? Çак кĕрпе çĕр-шывра дефицит тенĕ сас-хура çỹрет иккен. Анчах та ку пĕрре те тĕрĕс мар. Раççей Ял хуçалăх министерстви çирĕплетсех калать: хура тул саппасĕсем çителĕклех, чикĕ леш енне сутмалăх та пур! Пурте ăнланатпăр _ хаксене юри ỹстереççĕ. Эпир вĕт-ха мĕнле: мĕн те пулин хакланнине илтетпĕр çеç _ тỹрех туянма васкатпăр. Çав тавара урăх нихăçан та тупса илеймесрен хăратпăр-ши? Хура тула 90 тенкĕ парса туянмасан выçса вилетпĕр-ши? Пире куçăнах улталанине мĕншĕн ăнланмастпăр? Чăваш халăхĕ çине тăрсах çиекен апатах мар вĕт-ха хура тул, пĕр хушă унсăрăн та пурăнкалăпăр. Çĕр улми ăнса пулчĕ вĕт кăçал, выçах лармăпăр.
Пĕр çын çулталăкне вăтамран 3,5 килограмм хура тул çиет.
Туянакансем хăраса ỹкнипе усă кураççĕ те спекулянтсем, хаксене виçесĕр хăпартса яраççĕ. Курăр акă _ халăх ухмаха ернĕ пек хаклăпах пĕтĕм кĕрпене туянса лăплансанах хаксем чакаççĕ. Сăмах май, хура тул ăнсăртран питĕ хакланнă лару-тăрупа Монополие хирĕçле федераллă служба питĕ кăсăкланать иккен, унта ку енĕпе тĕрĕслевпе тĕпчев ĕçĕсем пуçарнă. А.КАРПОВА.