Публикации » Сочинени çырнă чух словарьпе усă курма ирĕк пур

22 ноября 2014 г.

Кăçал выпускниксен патшалăх экзаменĕ умĕн çут çанталăк, вăрçă тата Лермонтов çинчен хăйсен шухăшне палăртмалла. 11-мĕш класра вĕренекенсем декабрĕн 3-мĕшне пăлханса кĕтеççĕ. Шăпах çак кун Раççейри мĕн пур шкулта патшалăх экзаменĕ енĕпе вырăс чĕлхипе тата литературипе сочинени çырмалла пулĕ. Экзамен 3 сехет те 55 минута тăсăлнине шута илсе çăмăл апатпа шыв илсе кĕме чармĕç. Çавăн пекех орфографи словарĕпе усă курма ирĕк пур. Чăваш Республикинче пĕтĕмлетỹ сочиненине 6,1 пин çамрăк çырĕ (районта _ 87). Хевтесĕр ачасем сочинени вырăнне изложени суйлама пултараççĕ. 11-мĕш класран вĕренсе тухакансен сочиненийĕнче 350 сăмахран кая мар пулмалла. Ĕçсене "зачет" е "незачет" паллăпа хаклĕç. Пĕрремĕшне тивĕçнисем çеç патшалăх пĕтĕмлетỹ аттестацине (патшалăх экзаменне) иртме ирĕк илĕç. Иккĕмĕш хаклава тивĕçнисем лару-тăрăва февралĕн 4-мĕшĕнче е майăн 6-мĕшĕнче тепĕр хут сочинени çырса улăштарма пултараççĕ. Техника енĕпе вĕренес текенсемшĕн "зачет" çителĕклĕ пулĕ. Гуманитари енĕпе каякансен ĕçĕсем вара урăх хаклава та тивĕçĕç. Вĕренме кĕнĕ чухне вĕсене тишкерсен йышăну комиссийĕ 10 балл таран хушса пама пултарать. Ал çырăвĕсем шкулта, электрон вариант Раççей базинче 5 çул таран упранĕ. Сочиненисен 50 проценчĕ пĕр пек пулсан пур ĕçе те пăрахăçлаççĕ. Çавăнпа та кашни ача хăйĕн ăсне кăна шанни вырăнлăрах пулĕ. Ноябрĕн 20-мĕшĕнче районти пилĕк шкулта 87 пулас выпускник вырăс чĕлхипе сочинени çырса пăхнă. Вĕренекенсен виçĕ темăран пĕрне суйласа илме май пулнă.

А.КАРПОВА хатĕрленĕ.