29 ноября 2014 г.
"Свобода" колхозра ĕçлекен ЧР тава тивĕçлĕ ял хуçалăх ĕçченĕ Раиса Филиппова çĕр ĕçченĕн уявĕнче наградăсемпе чысланисенчен пĕри пулчĕ. Раиса Ивановна агропромышленность комплексĕнче нумай çул тỹрĕ кăмăлпа тухăçлă ĕçленĕшĕн тата унăн аталанăвне пысăк тỹпе хывнăшăн Чăваш Республикин Пуçлăхĕн Михаил Игнатьевăн Тав çырăвне тивĕçрĕ. Раиса Ивановна Филиппова зоотехникра 30 çул ытла ĕçлет. Хăй вăхăтĕнче вăл Чулхула облаçĕнче ветеринара вĕренсе тухнă. Çавăнтанпах асăннă хуçалăхра тăрăшать. Вăл колхозăн 330 пуç мăйракаллă шултра выльăхне, вăл шутра 100 ĕнене, апатлантарас, сиплес ĕçе йĕркелесе тăрать. Тăватă çул каялла шăрăх çанталăк самаях шар кăтартнă чух та хуçалăх ĕне шутне чакарман. Халĕ те хуçалăх районта сĕт, аш-какай илессипе, выльăхсене ỹт хуштарассипе лайăххисен шутĕнче. Çакă, паллах, Раиса Ивановна ĕçе тĕрĕс йĕркеленинчен те килет. Раиса Ивановнăн килĕнче те картиш тулли выльăх. Хăй кунĕпех ĕçре пулнăран вĕсене ытларах мăшăрĕ Евгений Вениаминович пăхать. Пурнăçа саплаштарас тĕллевпе Филипповсем икĕ ĕне усраса патшалăха сĕт параççĕ. Кил хуçи вĕлле хурчĕ те ĕрчетет. Филипповсен ачисем те пĕчĕклех ĕçе хăнăхса çитĕннĕ. Çавна май ашшĕ-амăшне пулăшма хуларан килсех çỹреççĕ.
А.ДМИТРИЕВА.