29 ноября 2014 г.
Хуть те мĕнле амăшĕшĕн те чи пĕлтерĕшли _ ачи таса та сывă ỹсни. Анчах та ача ỹснĕ чух чирлемесĕр ниепле те пулмасть. Кун пек чух вара шурă халатлисенчен пулăшу ыйтатпăр. Район больницин ача-пăча консультацийĕнче паянхи кун пурĕ 11 çын тимлет: виçĕ тухтăр, çичĕ медицина сестри, пĕр санитарка. Елена Матвеева, Владимир Ульянов педиатрсем ачасене сыватас ĕçре чылай çул тăрăшаççĕ. Инна Козлова вара ку ĕçе кăçал çулла пуçăннă, район больницине вăл "Земство тухтăрĕ" программăпа килĕшỹллĕн килнĕ. Районти 3030 ачан сывлăхне упрассишĕн яваплă ача-пăча консультацийĕнче тимлекенсем. Чирлĕ ачасене сыватасси, прививкăсем тăвасси, профилактика тĕрĕслевĕсем ирттересси _ вĕсен тивĕçĕ. Ача таса та сывă ỹстĕр тесен ăна вăхăтра профилактика тĕрĕслевĕ витĕр кăлармаллине аса илтереççĕ педиатрсем. Медицина тĕрĕслевĕсене çак ỹсĕмре тумалла: - ача анчах çуралсан; - çулталăка çитиччен кашни уйăхра; - 1 çул та 3 уйăхра; - 1 çул та 6 уйăхра; - 1 çул та 9 уйăхра; - 2 çулта; - 2 çул та 6 уйăхра; - 3 çултан пуçласа 17 çула çитиччен _ çулталăкра пĕрре; - ача садике, пĕрремĕш класа каяс тата професси пĕлĕвĕ илме пуçлас умĕн. А.КАРПОВА.