10 декабря 2014 г.
Декабрĕн 1-мĕшĕнче районти икĕ ватă _ Хĕрлĕ Чутай салинчи Елена Захарова тата Мишеркассинчи Ольга Савельева _ 90 çул тултарнă. Сумлă юбилейĕсем ячĕпе вĕсем патне çак кун РФ Президентĕнчен Владимир Путинран саламлă Çырусем çитнĕ. Çавăн пекех ватăсене райадминистрацин тата ял тăрăхĕсен специалисчĕсем саламланă.
Хĕрлĕ Чутай салинче пурăнакан Елена Захаровапа "Пилеш" ача садĕнче час-часах тĕл пулатпăр _ вăл кунта каçсерен кĕçĕн мăнукне илме килет. "Çамрăксене питĕ нумай ĕçлеттереççĕ халĕ, тепĕр чух вĕсен садике килме те вăхăчĕ çук. Мĕн тăвас тетĕн, пурнăçа саплаштарас тесен ĕçлемеллех", _ тет Елена Васильевна, хăй садике мĕншĕн килнине ăнлантарса. Çак правур та вăр-вар кинеми декабрĕн 1-мĕшĕнче 90 çул тултарнине пĕлсен вара тĕлĕнмеллипех тĕлĕнтĕм. Вăт, пурин те çак çула çитсе пурнăçпа киленсе пурăнма пĕлесчĕ тесе шутларăм. Хăйĕн ĕмĕрĕнче нушине ыттисемпе танах тỹснĕ-ха ĕнтĕ Елена Захарова: вăрçă хĕн-хурне те курнă _ Атăл хĕрринче тыткăна илнĕ нимĕç салтакĕсене пăхса пурăннă, тылра та ĕçленĕ, кайран арканнă хуçалăха ура çине тăратнă, колхозра вăй хунă. Елена Васильевна _ ĕç ветеранĕ. Мăшăрĕпе, Ефим Феофановичпа, 58 çул пĕрле пурăннă, икĕ ача пăхса ỹстернĕ. Шел те, кăçал вăрçă ветеранĕ пурнăçран уйрăлса кайнă. Халĕ Елена Захарова мăнукĕсемпе тата кĕçĕн мăнукĕсемпе пĕрле хăтлă хваттерте пурăнать, вĕсен ăшшине туйса пурнăçпа савăнать.
Мишеркассинчи Ольга Савельеван пурнăç çулĕ тикĕс килмен. Çапах вăл ку таранччен çирĕп ăспа çивĕч тăн упраса хăварнă. Нумай çул ĕнтĕ вăл ывăлĕн çемйипе пурăнать. _ Хам ĕмĕрте хуйхи-суйхине пайтах куртăм. Халĕ, ав, савăнса пурăнатăп. Ир тăнă çĕре сĕтел çинче апат хатĕр. Ывăлпа кин мана лайăх пăхаççĕ, патшалăх та пăрахмасть, _ тет Ольга Савельева.
А.ДМИТРИЕВА, А.КАРПОВА.