Публикации » Кашни кунпа савăнса пурăнаççĕ

17 декабря 2014 г.

Района сумлă юбилейсем ячĕпе РФ Президентĕнчен Владимир Путинран саламлă Çырусем килсех тăраççĕ. Акă декабрĕн 8-мĕшĕнче Хирлỹкасси ялĕнчи Лидия Федоровна Васильева тата Мишеркассинчи Мария Владимировна Трифонова саламлă Çырусем илнĕ. Райадминистрацин тата ял тăрăхĕн специалисчĕсем те ватăсене юбилей ячĕпе саламланă. Хирлỹкасси ялĕнче кĕçĕн ывăлĕн çемйипе пурăнакан Лидия Федоровна Васильева мăшăрĕпе çичĕ ывăлпа икĕ хĕр пăхса çитĕнтернĕ. Йышлă çемьене тăрантарма пайтах тар юхтарнă. Çитĕнсе çемьеллĕ пулсан тăватă ывăлĕ пĕрин хыççăн тепри çут тĕнчепе сыв пуллашни амăшне самай хавшатса хăварнă. Çапах вăл 95 çулта та çирĕп ăс-тăн упраса хăварнă. Мишеркасси ялĕнчи Мария Владимировна Трифонова мăшăрĕпе виçĕ хĕрпе виçĕ ывăла кун çути парнеленĕ. Мăшăрĕ вăрçăран хăрах аллине çухатса таврăннă пулин те ĕçсĕр ларман, ырми-канми колхозра тимленĕ. Мария Владимировна та ĕмĕрĕпех колхозра тăрăшнă. Халĕ кĕçĕн ывăлĕн çемйипе пурăнать. Шел пулин те, аслă ывăлĕпе пĕр хĕрĕ пурнăçран уйрăлса кайнă. Тăхăр вунă çулта пулин те Мария Владимировнан алли пур ĕç патне те çыпăçать. Çулла улмуççисем айĕнчи утта та хăех çулать, пахчара та тимлет. Кинеми паянхи кун та патвар та вăр-вар, ачисен ăшшине туйса кашни кунпа савăнса пурăнать. Г. НИКОЛАЕВА.