20 декабря 2014 г.
Декабрĕн 17-мĕшĕнче районта, республикăри пекех, Пĕрлехи информаци кунĕ иртрĕ. Анчах та ытти уйăхрисемпе танлаштарсан вăл пачах расна пулчĕ: чаплă, пуян та пĕлтерĕшлĕ тĕрлĕ объектсем хута кайрĕç. Информаци ушкăнĕсем районти пур ял тăрăхне çитрĕç, унта пурăнакансемпе тĕл пулса калаçрĕç. Асăннă кун Раççей Президенчĕ В.Путин Федераллă Пухăва янă Çырăва, Чăваш Республикин 2015 çулхи тата 2016-2017 çулсенчи планпа пăхса хунă бюджетне, Чăваш Республикинче халăха социаллă пулăшупа тивĕçтерессине, Чăваш Республикин Пуçлăхĕн ялти культура çурчĕсене аталантармалли мерăсем, культурăпа туризм сферинчи патшалăх политикине лайăхлатмалли хушма мерăсем çинчен калакан Указĕсене пурнăçа кĕртессине тата Культура çулталăкĕнчи республикăри мероприятисене, республика территорийĕнче пушар хăрушсăрлăхĕпе тивĕçтерессине, 2015 çулхи пĕрремĕш çур çул валли республикăра тухса тăракан хаçат-журнала çырăнтарассине анлăн сỹтсе яврĕç. Çавăн пекех Питĕркасси, Тралькасси тата Кив Атикасси ял тăрăхĕсен клубĕсем пуянланчĕç. Çĕн Атикасси шкулĕнче спортзала çĕнĕ сăн кĕртнине паллă турĕç. Районти нумай ачаллă 22 çемье тỹлевсĕр çĕр лаптăкне тивĕçнине пĕлтерекен сертификат илчĕ. А.ОРИНОВА.