20 декабря 2014 г.
Чăваш Республикин Пуçлăхĕ ялти культура çурчĕсене аталантармалли мерăсем, культурăпа туризм сферинчи патшалăх политикине лайăхлатмалли хушма мерăсем çинчен калакан хăйĕн Указĕсене пурнăçа кĕртессине тата Культура çулталăкĕнче республикăри мероприятисене ирттерессине хăйĕн тимлĕхĕнче тытать. Çавна пулах Пĕрлехи информаци кунĕнче районта виçĕ клуб пуянланнине савăнăçлă лару-тăрура паллă турĕç. Тралькассинчи, Кив Атикассинчи, Питĕркассинчи Культура çурчĕсем кашни çĕнĕ сăн кĕртсе патшалăхран 15 тĕрлĕ музыка оборудованине, компьютера, принтера, сцена костюмĕсене тата ытти япаласене тивĕçрĕç. Çак куна кĕтсе çав тăрăхри ĕçченсем республикăри тĕрлĕ конкурссене хутшăнчĕç, çĕнтерỹçĕсен йышне кĕчĕç, юсарĕç, сăрларĕç... Çĕр çывăрмасăр ĕçлерĕç. Уйрăмах ку енĕпе темиçе çул хыççăн кăçал питĕркассисем çанă тавăрса ĕçлени курăмлă. Культура ĕçченĕ Георгий Ярлов тăрăшнипе 15 çул хыççăн питĕркассисен пĕрле пуçтарăнмалли вырăн пулчĕ. Оксана Мидушкина, Нонна Хорайкина, Маргарита Огонькова уйрăмах ыттисенчен ытларах тăрăшнипе питĕркассисен клуб уçăлчĕ. Декабрĕн 17-мĕшĕнче Шупашкартан килсе çитнĕ Пĕрлехи информаци ушкăнĕпе пĕрле район пуçлăхĕ А.Степанов, район администрацийĕн пуçлăхĕ А.Башкиров Питĕркасси, Тралькасси, Кив Атикасси культура çурчĕсене çитсе хăюсем касрĕç, паллă пулăмпа саламласа парнесемпе чысларĕç. Палăртмалла, уява хутшăнса Чăваш Патшалăх Канашĕн депутачĕ Валерий Павлов виçĕ ял тăрăхне республика ячĕпе çутă, сасă, музыка инструменчĕсем тата сцена костюмĕсем туянма пулăшакан 400 пин тенкĕлĕх сертификат парса чысларĕ тата уйрăмăн хăй ячĕпе парне те турĕ. А.ОРИНОВА.