20 декабря 2014 г.
Районти "Хастар" физкультурăпа спорт комплексĕнче кашни эрнерех тĕрлĕ ăмăртусем иртеççĕ. Юлашки вăхăтра республика шайĕнчи ăмăртусене кунта ирттересси те йăлана кĕчĕ. Уйрăмах бассейна ишме çỹрекенсем йышлă. Шкулта кĕçĕн классенче вĕренекенсем те физкультура урокĕсенче хаваспах ишме вĕренеççĕ, аслисем те пушă вăхăта бассейнра ирттерме кăмăллаççĕ. Асăрхарăр ĕнтĕ, спорткомплекс уçнăранпа нумай та вăхăт иртмерĕ, пирĕн ишекенсем вара республикăри ăмăртусенчен лайăх кăтартусемпе таврăнаççĕ. Паллах, çак ĕçре тренер-преподавательсен тỹпи пысăк. Акă нумаях пулмасть Пăрачкав районĕнчи "Дельфин" физкультурăпа спорт комплексĕнче иртнĕ уçă ăмăртусене район çамрăкĕсем хутшăннă. Вĕсем "Хастар" ФСК тренер-преподавателĕсем (уйрăмах Юрий Столяров ăшă сăмаха тивĕç) ертсе пынипе ишессипе тĕрлĕ дистанцисене парăнтарса малти вырăнсене тухма пултарнă. 1998-2000 çулсенче çуралнă хĕрсем хушшинче ирĕклĕ майпа ишсе (100 метр) Инна Крыцова пĕрремĕш пулнă, Евгения Герасимова _ иккĕмĕш. Çак ỹсĕмри каччăсем хушшинче хĕрлĕчутайсем пьедесталăн пур картлашкине те йышăннă: Александр Михопаров _ пĕрремĕш, Кирилл Мареев _ иккĕмĕш, Константин Фондеркин _ виççĕмĕш. 2003-2006 çулсенче çуралнисем хушшинче ирĕклĕ майпа ишсе (50 метр) Егор Секайкина çитекенни пулман, Федор Ябыков _ виççĕмĕш. 2007 çулта çуралнă ачасем хушшинче ирĕклĕ майпа ишсе (25 метр) Вадим Иванов пĕрремĕш пулнă. 2001-2002 çулсенче çуралнă хĕр ачасем хушшинче ирĕклĕ майпа ишсе (100 метр) Ксения Мидакова пьедесталăн виççĕмĕш картлашки çине тăнă. Вăл браспа ишсе те (200 метр) иккĕмĕш пулнă. А.АЛЕКСЕЕВА.