28 января 2015 г.
Çĕнĕ çул умĕн "Единая Россия" партин Чăваш регион уйрăмĕпе Чăвашпотребсоюзĕн республикăри потребительсен обществин союзĕ çак ятпа ирттернĕ ыр кăмăллăх акцине Чăваш Енре пурăнакансем хастар хутшăннă. Иртнĕ çулхи ноябрь-декабрь уйăхĕсенче лавк-касемпе суту-илỹ вырăнĕсенче пылак çимĕç пухма ятарласа ешчĕксем вырнаçтарнă. Çак тапхăрта вĕсенче 10 пин ытла парне, уçăмлăрах каласан _ пĕр тонна ытла шăккалат, пухăннă. Çĕнĕ çул елкисемпе ача-пăча сачĕ-сенчи утренниксенче тăлăхсене, тулли мар çемьесенчи, Украинăри вăрçа пула тарса килнисен ачисене, йывăр лару-тăрăва лекнĕ çул çитмен çамрăксене, ашшĕ-амăшĕн хỹтлĕхĕсĕр юлнисене валеçсе панă. "Ачасене _ шăккалат" ыр кăмăллăх акцийĕ иртнĕ чухне власть тытăмĕнче ĕçлекенсем те, тĕрлĕ шайри депутатсем те айккинче юлман, хăйсен тỹпине хывнă. Вĕсемех вырăнсенче уяв мероприятийĕсем йĕркелеме пулăшнă. Етĕрнери культура çуртĕнчи уявра, акă, Чăваш Республикин Патшалăх Канашĕн депутачĕ, Чăвашпотребсоюз канашĕн председателĕ, "Ачасене _ шăккалат" проект ертỹçи Валерий Павлов тулли пысăк хутаçлă Хĕл Мучи евĕр ачасене савăнтарнă, парнесем панă. Валерий Михайлович Хĕрлĕ Чутай районĕнчи Раштав елкине те пĕчĕк тупăшлă çемьесенчи ачасене пылак çимĕçпе хăналанă, вĕренỹре ỹсĕм суннă. Шупашкарти 3-мĕш шкулта ăс пухакан хевтесĕр ачасем патне "Единая Россия" партин Шупашкар хула уйрăмĕн политканашĕн членĕ, "ЧЭАЗ" ХАО-н персонал пайĕн директорĕ Сергей Кольцов çитнĕ. Паллах, пушă алăпа мар. "Единая Россия" партин Çĕнĕ Шупашкарти уйрăмĕн хастарĕсем вара хулари коррекци вĕренỹ учрежденийĕнчи пур ачана та пылак çимĕçпе хăналанă. "Единая Россия" партин Чăваш регион уйрăмĕпе Чăвашпотребсоюзăн республикăри потребительсен обществин союзĕ ыр кăмăллăх акцине хутшăннă учрежденисемпе организацисене, уйрăм çынсене сăваплăх туйăмĕшĕн тав тунă.
Ю.ЛИСТОПАД.