30 января 2015 г.
Январĕн 25-мĕшĕнче Хĕрлĕ Чутай салинче пурăнакан Аслă Отечественнăй вăрçă ветеранĕ Иван Никандрович Фролов 90 çул тултарнă. Йăлана кĕнĕ тăрăх юбилей ячĕпе ветерана райадминистраци, районти ветерансен пĕрлешĕвĕн представителĕсем саламланă. Çавăн пекех Иван Фролов РФ Президенчĕн саламлă Çырăвне йышăннă. Иван Никандровича çара 1943 çулта илнĕ, Инçет хĕвел тухăçне янă. Ворошиловск хули патĕнче тăхăр уйăх курсант пулнă, унтан ăна Пермь облаçне янă. Кунта вăл сержантсен шкулĕнче виçĕ уйăх вĕреннĕ. Кĕçех кĕçĕн сержантсене Кировоград çывăхне фронта янă. Çапла чăваш каччи Кировоград, Минск, Бобруйск хулисене тăшманран ирĕке кăларнă çĕре хутшăннă. 1945 çулхи январь уйăхĕн 7-мĕшĕнче вăл тăракан часть Варшавăна ирĕке кăларас тесе çапăçăва кĕнĕ. Иван Никандрович 68-мĕш мотомеханизациленĕ бригадăра ПТР наводчикĕнче çапăçнă. Çав çулах апрель уйăхĕнче вĕсем Кенигсберг, Гданьск хулисене илнĕ. Çапăçусенче палăрнăшăн Иван Фролов Хĕрлĕ Çăлтăр, Аслă Отечественнăй вăрçăн иккĕмĕш степеньлĕ орденĕ-сене, "Кенигсберга илнĕшĕн" тата ытти медальсене тивĕçнĕ. Тăван киле вăл 1948 çулта таврăннă. Вăрçă ветеранĕ çулĕсене пăхмасăр халĕ те хастар, районта иртекен тĕрлĕ уяв мероприятийĕсене хаваспах хутшăнать. Тĕл пулусенче çитĕнекен ăрăва вăрçă çулĕсем çинчен аса илсе каласа парать, Тăван çĕр-шыва юратма чĕнсе калать.
Альбина ЗАМУТКИНА.
Источник: "Пирěн пурнăç"