Публикации » Çĕр пайне çухатас марччĕ

06 февраля 2015 г.

Иртнĕ ĕмĕрĕн 90-мĕш çулĕсенче колхозсен тата совхозсен пур членне те харпăрлăха çĕр пайĕсем панăччĕ. Граждансен харпăрлăхне куçнă ял хуçалăх çĕрĕсен лаптăкĕ Чăваш Республикинче пĕтĕмпе 543 пин гектара яхăн йышăнатчĕ. Хăш-пĕр районсенче вырăнти фермерсем уйсене арендăна илсе ял хуçалăх культурисем, тыр-пул ỹстернĕ. Çын ури пусман, çум курăк кашлакан вырăнсем те пулман мар. Çĕр лаптăкĕ пулнă. Унпа мĕн тумаллине вара никам та пĕлмен. Документсене пухас ĕç никама та кирлĕ пулман-çке. Кăлăхах. Раççей реестрĕн Чăваш Республикинчи Управленийĕнчен пĕлтернĕ тăрăх уйăрнă çĕр лаптăкĕпе вăхăтра тивĕçлĕ усă курмасан, унпа виçĕ е ытларах çул хушши нимĕн те тумасан (регистрацилемесен те) вăл кирлĕ маррисен йышне куçать. Çакăн пек пая суд йĕркипе муниципаллă харпăрлăха параççĕ. Судран пулăшу ыйтиччен вырăнти власть органĕ кирлĕ мар çĕр лаптăкĕсен списокне йĕркелесе ăна хаçатра пичетлеттерет е информаци стенчĕсенче кăларттарать. Кун пек çĕрсем ытларах чухне ял тăрăхĕ-сен администрацийĕсен харпăрлăхне куçаççĕ. Паянхи кун республикăра муниципаллă харпăрлăхра 30 пин çĕр пайĕ шутланса тăрать ĕнтĕ. Çавăнпа та çĕр пайне çухатас мар тесен документсене вăхăтра пухмалла, пурлăха правасен Раççей реестрĕнче регистрацилемелле.

М.ИВАНОВА.

Источник: "Пирěн пурнăç"