06 февраля 2015 г.
Хуçалăх тĕрекленсе пырасси, унăн çутă пуласлăхĕ ертỹçĕрен питех те нумай килнине паян никам та хирĕçлемĕ. Ăçта чăн-чăн хуçа пур _ унта ĕç те кал-кал пырать. Çавăн пеккисен шутĕнче _ Валериан Федотович Бромбин. В.Бромбин 1995 çултанпа ĕнтĕ "Свобода" хуçалăх тилхепине çирĕп тата тĕрĕс çул-йĕрпе тытса пырать. Ăнăçу çулĕпе тесен те тĕрĕс. 20 çул хушшинче хуçалăх пур енлĕн аталанчĕ, тĕрекленчĕ, районти хуçалăхсем хушшинче тыр-пул пухса илес, выльăх-чĕрлĕх отрасльне аталантарас енĕпе малтисен ретĕнче. Валериан Федотовичăн тỹрĕ кăмăлĕпе пултарулăхне пула колхоз ят-сумĕ çỹллĕ шайра тăрать. Валериан Федотович Бромбин 1950 çулхи февралĕн 5-мĕшĕнче, шăпах 65 çул каялла, Анат Çĕрпỹкасси ялĕнче кун çути курнă. Шкул вăхăчĕ çитсен В.Бромбин кĕçĕн классене ялти шкула çỹренĕ, тулли мар вăтам пĕлỹ Тури Çĕрпỹкасси шкулĕнче илнĕ. 1965-1969 çулсенче çамрăк Çĕрпỹри хуçалăх техникумĕ-нче пĕлĕвне ỹстернĕ. 1969-1971 çулсенче çар тивĕçне пурнăçланă. 1987-1993 çулсенче Анат Çĕрпỹкасси каччи Чăваш патшалăх ял хуçалăх институтĕнче куçăмлă майпа аслă пĕлỹ илнĕ. В.Бромбин ĕç стажне "Восток" колхозра техника паркĕн бригадирĕнчен пуçланă, унтан _ "Марксист" колхозăн автомеханикĕ, профком председателĕ, тĕп инженер, колхоз председателĕн çумĕ, тĕп агроном. 1995 çулхи июнь уйăхĕнче ăна "Свобода" хуçалăх ертỹçин пуканне сĕннĕ. 2000 çулта Валериан Федотович ял хуçалăх производствине аталантарас тĕлĕшпе пысăк ỹсĕмсем тунăшăн "Чăваш Республикин тава тивĕçлĕ ял хуçалăх ĕçченĕ" хисеплĕ ята парса чысланă. Çавăн пекех вăл Чăваш Республикин ял хуçалăх министерствин тата район администрацийĕн чылай Хисеп грамотисемпе парнисене тивĕçнĕ. Валериан Федотович председатель лавне туртма пуçланăранпа 20 çул çитет ĕнтĕ. Çак тапхăрта вăл тăрăшнипе "Свобода" колхозра питĕ нумай курăмлă улшăнусем пулса иртнĕ. Ытти хуçалăхсемпе танлаштарсан, вĕсен кантур çурчĕ те çĕнĕ, капмар, илемлĕ. "Свобода" колхозăн ертỹçи тăрăшнипех выльăх-чĕрлĕх отраслĕ те хăватлă аталанса пырать. Акă камран тĕслĕх илмелле! Ĕнер "Чăваш Республикин тава тивĕçлĕ ял хуçалăх ĕçченĕ", "Свобода" колхозăн ертỹçи Валериан Федотович Бромбин хăйĕн 65 çулхи юбилейне паллă турĕ. Хисеплĕ Валериан Федотович! Юбилей ячĕпе ăшшăн саламлатпăр, пурнăçра телей, ырлăх-сывлăх сунатпăр.
Алина ОРИНОВА.
Источник: "Пирěн пурнăç"