20 февраля 2015 г.
Хăйĕн пĕтĕм пурнăçне, ĕç-хĕлне тăван çĕрпе çыхăнтарнă çынсенчен пĕри вăл _ "Коминтерн" ЯХПК-н 1-мĕш класлă тракторист-машинисчĕ Николай Лаврентьев. Чун килĕштернĕ ĕçпе асăннă хуçалăхра вăл 40 çула яхăн вăй хурать. Николай Егорович çак кунсенче "Чăваш Республикин тава тивĕçлĕ механизаторĕ" хисеплĕ ята тивĕçрĕ. Николай Лаврентьев колхоз ĕçне 1977 çулта кỹлĕ-ннĕ. Çавăнтанпах тĕрлĕ техникăпа ял хуçалăх ĕçĕсене яваплăха туйса пурнăçлать, шанса панă техникăна яланах юсавлă тытать. Коллективра хисепе тивĕçнĕ механизатор нумай çул ĕçлесе пухнă пуян опычĕпе çамрăксене хаваспах паллаштарать. Халĕччен Николай Егорович ĕçре йĕркене, çул çинче çул-йĕр правилисене пăсни пулман. Трактор-машинăна вăл техника тĕрĕслевĕ витĕр вăхăтра кăларать. Николай Егорович ял хуçалăхĕнчи пур ĕçе те активлă хутшăнать, сухалать, акать... Выльăхсене хупса усранă вăхăтра тракторпа кооператив уй-хирне тислĕк турттарать. Ĕç кăтартăвĕсем унăн çулран-çул лайăхланса пыраççĕ. 2012 çулта Николай Егорович МТЗ-82 тракторпа 1606 эталонлă гектар, 2013 çулта _ 1878 эталонлă гектар, 2014 çулта 1984 эталонлă гектар ĕç тунă. Производствăри пысăк кăтартусемшĕн вăл пĕрре мар тĕрлĕ шайри Хисеп хучĕсене, çулталăкри ĕç кăтартăвĕ-семпе темиçе хут кооперативри "Чи лайăх механизатор" ята тивĕçнĕ. Николай Егорович Трапайра пурăнать, мăшăрĕпе виçĕ ача ỹстерсе çын тунă. А.ЗАМУТКИНА.
Источник: "Пирěн пурнăç"