27 февраля 2015 г.
90 çулхи тата ун хыççăнхи юбилей ячĕпе РФ Президентĕнчен Владимир Путинран саламлă Çырусем района килсех тăраççĕ. Акă февралĕн 21-мĕшĕнче Шулю ялĕнче пурăнакан Надежда Тимофеевна Инедеркина та хăйĕн 95 çулхи юбилейне кĕтсе илнĕ, саламлă Çырăва тивĕçнĕ. Надежда Тимофеевна нумай ачаллă çемьере çуралнă, мĕн пĕчĕкрен ĕçе хăнăхса пынă. Вăрçă пуçланнă пирки хăрушă хыпар çитсен вăл ытти тантăшĕсемпе аслисемпе тан ĕçленĕ, йывăрлăхсене парăнтарнă. Хăйĕн çур ĕмĕрне шкулпа çыхăнтарнă Надежда Тимофеевна. Шулю шкулĕнче пуçламăш классене вĕрентнĕ вăл. Хăйĕн ĕçне чунтан парăннă педагог ачасене хăйĕн ăшшине тата çепĕçлĕхне парнеленĕ, вĕсене пĕлỹ тĕнчипе паллаштарнă. Инедеркинсем пĕр хĕр çитĕнтернĕ. Хĕрĕ, Алевтина, амăшĕ пекех ал ĕçĕпе аппаланать, картинăсем тĕрлет, кивĕ хаçат-журналтан илемлĕ карçинккасем ăсталать. Надежда Тимофеевна та ĕçсĕр лармасть, халĕ те республикăри тата районти пулăмсене пĕлсе тăрать, кĕнеке-хаçат интересленсех вулать. Паянхи кун ватăна Алевтина хĕрĕпе Леонид кĕрỹшĕ пăхса тăраççĕ. Мăнукĕсемпе кĕçĕн мăнукĕ те килсех çỹреççĕ кукамăшĕ патне. Тăванĕсемпе кỹршисем те кинемее хисеплеççĕ, ăслă сĕнỹ-канашпа пулăшнăшăн тав тăваççĕ.
А.АЛЕКСЕЕВА.
Источник: "Пирěн пурнăç"