06 марта 2015 г.
Çакăн пек калаççĕ Атнар ял тăрăхĕнче Елена Александровна Матвеева пирки. Мĕншĕн тесен кăçал вăл "Чăваш Республикин ялхуçалăхĕн тава тивĕçлĕ ĕçченĕ" ята тивĕçрĕ. Выльăх пăхасси уншăн ачаранах пĕлнĕ ĕç пулнă, анчах Елена фермăна 30 çул урлă каçсан тин килнĕ. "Коминтерн" ЯХПК-ра вăл 1992-мĕш çулта пăрусем пăхма пуçланă. Паянхи кун та сĕт комплексĕнче тимлет, Мария Князевăпа пĕрле 10 куна çитнĕ пăрусене 4 уйăхчен пăхать. Сĕт тапхăрĕнчи пăрусене ачаш пăхса талăкра вăтамран 800 грамм ытла ỹт хуштарать. Иртнĕ çул вăл вăтамран 126 пăру пăхнă, пĕтĕмпе 38770 килограмм ỹт хуштарнă. Ĕçри пысăк кăтартусемшĕн Елена Матвеева 2000-мĕш тата 2012-мĕш çулсен ĕç пĕтĕмлетĕвĕсемпе "Районти чи лайăх пăру пăхакан" ята тивĕçнĕ. _ Пăрусем вĕсем _ пĕчĕк ачасем пекех, пĕрмай тимлĕх кирлĕ. Вĕсем çын кăмăлне те лайăх туяççĕ, лăпканине юратаççĕ. Кăшт чирлесен те ача пек куçран хурлăхлă пăхаççĕ, _ тет Елена Александровна.
А.ЗАМУТКИНА.
Источник: "Пирěн пурнăç"