20 марта 2015 г.
Мартăн 18-мĕшĕнче Чăваш ỹнер музейĕнче Чăваш Республикин Пуçлăхĕн Михаил Игнатьевăн пресс-конференцийĕ иртрĕ. Чăваш Ен пуçлăхĕ федераци, республика тата хуласемпе районсенчи массăллă информаци хатĕрĕсен журналисчĕсен ыйтăвĕсем çине хуравларĕ. Ку хутĕнче пресс-конференцие 50 ытла журналист хутшăнчĕ. Республика Пуçлăхĕ 22 ыйту çине хурав пачĕ. Ыйтусем вара тĕрлĕрен пулчĕç: социаллă пурнăçпа экономика аталанăвĕ, кризиса хирĕç кĕрешесси, ялхуçалăх тытăмĕ, пурăнмалли çурт-йĕрпе коммуналлă хуçалăх, политика, Крым, ĕç укçи тата ытти те. Чăваш наци культурипе чĕлхине упраса хăварасси, тĕрлĕ регионсемпе ют çĕршывсенчи чăваш диаспорисем хушшинчи çыхăнăва анлăлатасси, Тăван çĕршывăн Аслă вăрçинче Çĕнтерỹ тунăранпа 70 çул çитнине уявласси, вăрçă историйĕпе çыхăннă палăксене, асăну хăмисене тирпей-илем кỹресси пирки те калаçу пычĕ. 2015 çулхи июнь уйăхĕнче Шупашкарта çăмăл атлетика енĕпе Европа командисен V чемпионачĕ уçăлни çинчен те, Литература çулталăкĕпе К.В.Иванов çулталăкне чыслăн ирттерес тавра та сăмах пычĕ. Çавăн пекех журналистсем темиçе хутчен те Михаил Игнатьев çитес суйлавра хăйĕн кандидатурине Чăваш Республикин Пуçлăхĕ пулма тăратасси-тăратмасси пирки ыйтрĕç. "Суйлав кăçал сентябрь уйăхĕнче иртет. Эпĕ хамăн кандидатурăна тăратма хатĕрленетĕп. Уйрăм муниципалитет пĕрлешĕвĕсенче активпа тĕлпулнă вăхăтра халăх çак ыйтăвах парать. Чăннипех те, суйлавччен вăхăт нумай юлмарĕ _ çур çул кăна. Эсир манран халăх шаннине туятăр-и тесе ыйтатăр. Эпĕ общественноçпа, общество ĕçченĕсемпе час-часах тĕл пулатăп. Вĕсем манран Чăваш Ен Пуçлăхĕ пулма суйлавра хамăн кандидатурăна тăратма ыйтаççĕ. Республикăра суйлав ирттермелли йĕркесене федераци тата республика саккунĕсем палăртаççĕ. Эпĕ "Единая Россия" политика партийĕн членĕ. Парти йышĕнче тăракан юлташсем хăйсен шухăшне калаччăр тесе эпĕ праймериза хутшăнатăп. Праймериза мĕнле схемăпа тата мелпе ирттерессине регионти конференци палăртĕ. Регион ертỹçин тĕллевĕ - суйлава уççăн, таса тата конкурентлă ирттерме майсем йĕркелесси", - терĕ Чăваш Ен Пуçлăхĕ.
А.ОРИНОВА.
Источник: "Пирěн пурнăç"