Публикации » 20 пин тенкĕ парĕç

25 марта 2015 г.

Раççей Правительстви амăшĕн капиталĕн-чен 20 пин тенкĕ памалли саккун проектне ырланă. Федераллă бюджетра çакна валли 54,2 млрд тенкĕ пăхса хунă. Дмитрий Медведев премьер укçана алла пани çемьесене хаксем ỹснĕ вăхăтра пулăшма кирлĕ тесе шутлать. Амăшĕн капиталне тивĕçнине ĕнентерекен сертификат пур çемьесем 20 пин тенкĕпе хăйсем пĕлнĕ пек усă курма пултараççĕ. Саккунпа килĕшỹллĕн, асăннă укçана илес текенсен вырăнти Пенси уйрăмне заявлени çырса памалла: амăшĕн капиталне 2007 çулхи январĕн 1-мĕшĕнчен пуçласа 2015 çулхи сентябрĕн 30-мĕшĕччен тивĕçнисен заявление 2015 çул вĕçлениччен çырмалла; амăшĕн капиталне 2015 çулхи октябрĕн 1-мĕшĕнчен пуçласа 2015 çулхи декабрĕн 31-мĕшĕччен тивĕçсен заявление 2016 çулхи мартăн 31-мĕшĕччен çырмалла. Асăннă саккун 2016 çулхи майăн 1-мĕшĕччен ĕçлет.

Источник: "Пирěн пурнăç"