25 марта 2015 г.
Паянхи кун сĕт нумай енлĕ усă куракан тата питĕ хаклă апат шутланать. Ĕне сĕчĕ уйрăмах пур çĕршывра та анлă сарăлнă. Унра çын организмĕшĕн кирлĕ пур япала та пур. Чăваш Республикин Пуçлăхĕ Патшалăх Канашне янă Çырăвĕнче уççăнах республикăра пурăнакансене пурне те хамăр патра туса илнĕ паха сĕтпе тивĕçтермелли пирки каларĕ. Çавăнпа паха сĕт илес ыйту çивĕч тухса тăрать. Паха сĕт вара сывă ĕнен кăна пулать. Сĕт паракансен, сĕт пухакансен сĕт пахалăхне тĕрĕслесех тăмалла. Сĕтĕн çăвĕ тата ытти пахалăх кăтартăвĕсем те тивĕçлĕ шайра пулнине пĕлсе тăмалла. Сăмахран, сĕт пахалăхне палăртма районти чĕрчунсен чирĕсемпе кĕрешекен станци кăçал ятарлă хатĕрсем туянчĕ. Çавăн пекех мăйракаллă шултра выльăхсен лейкозĕ çинчен калас килет. Çак вируслă чиртен ниепле те сипленме çук, унран профилактика мелĕпе асăрханма кăна пулать. Çавăнпа выльăхсене çулленех ветеринари специалисчĕсене тĕрĕслеттермелле. Чир паллине пĕлсен кун пек выльăха уйăрмалла, унтан аш-какай комбинатне пусма леçмелле, ветеринари докуменчĕсем йĕркеллĕ пулмалла.
Е.ДОЛГОВА, ветеринари врачĕ.
Источник: "Пирěн пурнăç"