27 марта 2015 г.
Мартăн 24-мĕшĕнче Шупашкар районĕнчи Кỹкеçри çул çаври тĕлĕнче пысăк инкек пулнă. Унта 13 сехет те 50 минутра пилĕк машина çапăннă. Аварире тăватă çын пурнăçĕ татăлнă, 17-шĕ тĕрлĕ сурансемпе больницăна лекнĕ. Чăваш Республи-кин Шалти ĕçсен министерствин пресс-служби малтанласа пĕлтернĕ тăрăх, инкеке "Шкода" автомобиль водителĕ сăлтавланă. Вăл çула май пыракан MAN грузовикпе çапăннă та, йывăр машина çулăн транспорт хирĕç килекен енне тухса кайнă. Унта фура "Шупашкар- Çĕрпỹ" маршрутпа çула тухнă "Пежо" микроавтобуспа çапăннă. Пассажирсене илсе çỹрекен транспорт çунма пуçланă... Инкеке çавăн пекех АвтоВАЗ-ăн 99-мĕш модельлĕ машини (микроавтобуспа çапăннă хыççăн ун çине фура пырса кĕнĕ) тата грузсем турттаракан Газель (аварири ытти машинăсем çине пырса кĕрес мар тесе çул çинчен тухса кайнă та йывăçа пырса çапнă) лекнĕ. Ку инкеке куççульсĕр пăхма йывăр пулнă теççĕ ăна курнисем. Çĕрпỹ хулине çула тухнă "Пежо" хыпса илнĕ хыççăн пассажирсенчен виççĕшĕ чĕрĕллех çунса кайнă. Вилекенсенчен пĕри - микроавтобус водителĕ. Палăртмалла, "Шкода" автомобиле Канаш районĕнче пурăнакан çамрăк водитель тытса пынă. Вăл правине пĕлтĕрхи декабрь уйăхĕнче кăна илнĕ иккен, анчах çак хушăра çул-йĕр правилине тăватă хутчен пăсма ĕлкĕрнĕ. Авари вăхăтĕнче вăл урах пулни палăрнă. Енчен те асăннă водителе айăплă тесе йышăнсан, çак юнлă аваришĕн ăна çичĕ çуллăха ирĕксĕр хăварма, çавăн пекех ирĕке тухнă хыççăн тата виçĕ çуллăха водитель удостоверенийĕсĕр хăварма пултараççĕ. А.СЕМЕНОВА.
Источник: "Пирěн пурнăç"