08 апреля 2015 г.
Апрелĕн 6-мĕшĕнче "Пирĕн пурнăç" район хаçачĕн редакцине пичет ĕçĕн ветеранĕсем, штатра тăман корреспондентсем пухăнчĕç. Тĕлпулăвăн сăлтавĕ район тĕкĕрĕн сумлă юбилейĕ пулчĕ. Аса илмелли, сỹтсе явмалли, тишкермелли чылай пулчĕ пухăннисен. Тĕрлĕ çулсенче тĕп редакторта тимленĕ Николай Павлович Барышниковпа Михаил Александрович Чемашкин, чылай çул хушши район хаçатĕнче вăй хунă Семен Егорович Ванюшин, Ираида Сергеевна Самылкина, Светлана Петровна Князькова асаилỹсен çăмхине сỹтнĕ май салам сăмахĕсене те каларĕç. Александр Петрович Трофимов, Геннадий Александрович Савельев, Светлана Вячеславовна Яруткина, Галина Вячеславовна Зотова, Валерий Константинович Романов, Анатолий Алексеевич Тихонов (Ĕмĕт), Матвей Семенович Кораков обществăлла корреспондентсем те район хаçатне вăрăм кун-çул сунса саламланă май малалла та райхаçатпа туслă пулма шантарчĕç. Район хаçачĕн тĕп редакторĕ Алина Оринова район хаçачĕн аталанăвĕнче пухăннисен тỹпи пысăк пулнине каларĕ, пурне те Тав çырăвĕсем тата парнесем парса чысларĕ.
Источник: "Пирěн пурнăç"