10 апреля 2015 г.
Хĕрлĕ Чутай районĕ пултаруллă хĕрсемпе пуян пулнине пурте пĕлетпĕр, анчах та пурте сцена çине тухса хăйĕн маттурлăхне кăтартма хăюлăх çитереймест. Çавăнпа та мартăн 30-мĕшĕнче районти Культура çуртĕнче иртнĕ "Чутай Нарспийĕ-2015" конкурса хутшăннă пикесене чи маттуррисем тесе калас килет. Чăваш наци конгресĕн районти уйрăмĕ чăваш чĕлхине тата культурине аталантарас, Чутай тăрăхĕнчи çамрăксен пултарулăхне ỹстерес тата пуянлатас тĕллевпе тата Константин Иванов çулталăкне халалласа йĕркелесе ирттернĕ конкурсра хĕрсем хăйсемпе паллаштарчĕç, ташларĕç, юрларĕç, "Нарспи" поэмăри сыпăксене вуларĕç, ыйтусем çине хуравларĕç, хăйсем пĕçернĕ чăваш апатне çитерсе пăхтарчĕç. "Нарсписене" хаклама Чăваш наци конгресĕн вице-президенчĕ Валерий Клементьев, район пуçлăхĕ Александр Степанов, райадминистраци пуçлăхĕн çумĕ - экономикăпа пурлăх тата çĕр хутшăнăвĕсен пай начальникĕ Алина Ярабаева, культурăпа спорт тата архив ĕçĕн пай начальникĕ Александр Самсонов, Чăваш наци конгресĕн районти уйрăмĕн председателĕ Юлия Мареева, "Колибри" ташă ансамблĕн ертỹçи Наталья Храмова, Питĕркасси шкулĕн чăваш чĕлхипе литература вĕрентекенĕ Людмила Жукова хутшăнчĕç. "Чутай Нарспийĕ" ята пурте пĕр саслă пулса Хусанушкăнь ял тăрăхĕнчи Ирина Романована пачĕç. Кив Атикасси ял тăрăхĕнчи Наталья Соловьева "Çепĕç Нарспи", Тралькасси ял тăрăхĕнчи Инна Крыцова "Пултаруллă Нарспи", Мăн Этмен ял тăрăхĕнчи Валентина Михеева "Ĕçчен Нарспи", Хĕрлĕ Чутай ял тăрăхĕнчи Вера Терентьева "Куракансем кăмăлланă Нарспи" ята тивĕçрĕç.
А.КАРПОВА.
Источник: "Пирěн пурнăç"