15 апреля 2015 г.
Паян Информаци кунĕнче сỹтсе явакан ыйтусенчен пĕри - çуркуннехи уй-хир ĕçĕсене туса ирттересси. Районта çурхи ĕçсене хатĕрленесси мĕнле пырать-ши? Кун пирки райадминистрацин ялхуçалăх пайĕн начальникĕ Владимир Храмов каласа парать:
- Кунран-кун хĕрỹ тапхăр - ака-суха - çывхарса килет. Çавăнпа çак яваплă ĕçе тивĕçлĕ шайра туса ирттерес ыйту паян çивĕч тăрать. Унпа çыхăннă ыйтусене эпир ыран ялхуçалăх ĕçченĕсен "Коминтерн" ЯХПК-ра иртекен анлă канашлăвĕнче сỹтсе явасшăн. Çапах та кĕскен каласа хăваратăп, район çуракине тухма хатĕр, çанталăк лайăхлантăр кăна. Акмалли вăрлăха районта 110 процент янтланă, унтан 92 проценчĕ - кондициллĕ. Тракторсен 96 проценчĕ юсавлă, сеялкăсемпе плугсем 100 проценчĕпех хатĕр. Çунтармалли-сĕрмелли материалсене çурри ытла янтласа хунă. Апрелĕн 13-мĕшĕ тĕлне кĕрхи культурăсене тата нумай çул ỹсекен курăксене хуçалăхсем 50-шар гектар апатлантарнă, ĕçсем малалла пыраççĕ. Аса илтеретĕп, иртнĕ çул районти хуçалăхсем кĕрхи культурăсене 1586 гектар акса хăварнă. Вĕсем аван хĕл каçнă. Çанталăк çак кунсенче кăна ăшăтма пуçларĕ. Çавна май калчан ỹсĕм тапхăрĕ пуçланма кирлĕ. Март уйăхĕнче юр сахал çунипе нỹрĕк çĕре сăрхăнас вырăнне пăсланса пĕтнĕ. Çавăнпа тăпрара нỹрĕк çителĕксĕрри сисĕнет. Çумăрсем пуласса шанмалли кăна юлать. Тепĕр çивĕч ыйту - Чăваш Ен Пуçлăхĕ усă курмасăр выртакан çĕрсене 2016 çулччен йăлтах пусă çаврăнăшне кĕртме ыйтрĕ. Ку енĕпе пирĕн ĕçлемелли пайтах. Мĕншĕн тесен районта 5 пин гектар çĕр усăсăр выртать. Вĕсене фермерсен тата ĕçлесе пыракан хуçалăхсен шучĕпе пусă çаврăнăшне кĕртсе пыма шутлатпăр.
Источник: "Пирěн пурнăç"