Публикации » 16 çулхи арçынача шăллĕне çĕçĕпе чикнĕ

22 апреля 2015 г.

Апрелĕн 16-мĕшĕнче Шупашкарта пурăнакан пĕр çемьере инкек пулса иртни пирки хыпар республикипех пысăк хăвăртлăхпа сарăлчĕ. Усал сăмах утпа çỹрет тесе ахаль каламаççĕ çав. РФ следстви комитечĕн Чăваш Енри следстви управленийĕн сайчĕ пĕлтернĕ тăрăх, апрелĕн 16-мĕшĕнче ирхине ашшĕ 9 çулхи ывăлĕн виллине асăрханă. Çак йывăр преступление 16 çулхи аслă ывăлĕ тума пултарнă тесе ăна тытса чарнă ĕнтĕ. Тĕпчев тăрăх çак арçынача 2-мĕш класа каякан шăллĕне çĕçĕпе чикнĕ. Ача йывăр сурана пула вилсе кайнă. Çав вăхăтра ашшĕ-амăшĕ урăх пỹлĕмре çывăрнă. Ытти информаци çăлкуçĕсене ĕненес пулсан 9-мĕш класра вĕренекен арçынача килте компьютерпа ирчченех вăйă вылянă. Унччен те пулмасть арçынача компьютер патĕнчен тăнă та шăллĕ патне пырса ăна çĕçĕпе чиксе вĕлернĕ. Халĕ ку ĕçе Чăваш Енри следстви управленийĕ тĕпчет, çак уголовлă ĕçе уйрăм тĕрĕслевре тытаççĕ. Палăртмалла, пиччĕшĕпе шăллĕ Шупашкарти 47-мĕш шкулта вĕреннĕ. 

Источник: "Пирěн пурнăç"