Публикации » Мускавсене Чутайсен хурăн сĕткенĕ килĕшнĕ

15 мая 2015 г.

Çак кунсенче районти "Янтарь" ТЯО-н генеральнăй директорĕ Александр Степанов ячĕпе Чăваш Республикин сывлăх сыхлавĕн министрĕнчен Алла Самойловаран çыру килнĕ. Унта асăннă министерство Александр Юрьевича "Наци сывлăхĕ - Раççей аталанăвĕн никĕсĕ" форум валли "Чăваш Республики" экспозици хатĕрлеме пулăшнăшăн тав тунă. Пĕтĕм Раççейри "Наци сывлăхĕ _ Раççей аталанăвĕн никĕсĕ" форум Мускав хулинчи "Гостиный двор" курав комплексĕнче кăçалхи апрелĕн 9-11-мĕшĕсенче иртнĕ. Кăçалхипе тăххăрмĕш хут пулнă форумăн куравне Чăваш Республики пахалăхлă та сывлăхшăн усăллă апат-çимĕç тăратнă, çав шутра - "Янтарь" ТЯО кăларакан хурăн сĕткенне те. Алла Самойлова министр çырура хурăн сĕткенĕ форума хутшăннă хăнасене, ăна йĕркелекенсене питĕ килĕшнине палăртнă, Александр Степанов ертсе пыракан коллектива малашне те малтисен ретĕнче пулма, тăван ен аталанăвĕшĕн ăнăçлă ĕçлесе пыма суннă. А.ТИМОФЕЕВА.

Источник: "Пирěн пурнăç"