22 мая 2015 г.
Майăн 20-мĕшĕнче пирĕн районта салтак çулне çитмен çамрăксен Аслă Çĕнтерĕве 70 çул çитнине халалланă республикăри Спартакиади иртрĕ. "Хастар" ФСК çумĕнчи Тĕп стадионта Шупашкарти лицейран, Етĕрнери гимназирен, Вăрнарти, Хĕрлĕ Чутайри, Улатăрти, Елчĕк, Çĕмĕрле тата Комсомольски районĕсенчи шкулсенчен, Муркаш районĕнчи çарпа патриотизм клубĕнчен, Çĕрпỹри тата Канашри техникумсенчен килсе çитнĕ 11 команда тупăшрĕ. Кĕрнеклĕ те илемлĕ яшсем стройпа утрĕç, Калашников автоматне сỹтсе пухрĕç, пневматикăллă винтовкăран печĕç, граната ывăтрĕç, 2000 метра чупрĕç, çар эстафетинче вăй виçрĕç. Палăртма кăмăллă, Спартакиадăн пĕтĕмлетĕвĕ-семпе Хĕрлĕ Чутай шкулĕн команди (ертỹçи - Эдуард Романов педагог) пуринчен те маттуртарах пулнине ĕнентерсе 1-мĕш вырăна тухрĕ. Республика шайĕнче пурне те çĕнтерме пултарнă Хĕрлĕ Чутай шкулĕн чăннипех те маттур каччисем _ Артем Романов (ушкăн командирĕ), Алексей Дадюков, Стас Михопаркин, Ярослав Зайцев, Юрий Яндайкин, Константин Секайкин, Иван Пименов, Юрий Степанов, Дмитрий Афанасьев, Кирилл Андрианов _ июнĕн 26-мĕшĕнчен пуçласа июлĕн 2-мĕшĕччен Рязань хулинче иртекен Раççей шайĕ-нчи Спартакиадăра Чăваш Республикин чысне хỹтĕлĕç.
Алина КАРПОВА. (Фоторепортаж - редакци сайтĕнче).
Источник: "Пирěн пурнăç"