11 июня 2015 г.
Июнĕн 9-мĕшĕнче Раççей Президенчĕ Владимир Путин "Чăваш Республикин Пуçлăхĕн полномочийĕсене вăхăт çитиччен пăрахăçласси пирки" Указа алă пуснă, суйланнă республика Пуçлăхĕ хăйĕн должноçне йышăниччен Чăваш Ен Пуçлăхĕн тивĕçĕсене вăхăтлăх пурнăçлама Михаил Игнатьева çирĕплетнĕ.
Раççей Президенчĕн Указĕпе килĕшỹллĕн Михаил Игнатьев "Чăваш Республикин Пуçлăхĕн тивĕçĕсене вăхăтлăх пурнăçлакан пирки" Указ кăларнă, хăйĕн тивĕçĕсене июнĕн 9-мĕшĕнчен пурнăçлама тытăннă.
Çак кунах республика Пуçлăхĕн тивĕçĕсене вăхăтлăх пурнăçлакан Михаил Игнатьев "Единая Россия" политика партийĕн регионти уйрăмĕн политканашĕн ларăвне хутшăннă. Ларури йышăнусенчен пĕри - Чăваш Республикин Пуçлăхĕн должноçне кандидат тăратма кандидатура палăртассипе партире малтанхи сасăлав ирттересси.
Журналистсен ыйтăвĕсене хуравланă май Михаил Игнатьев çакна палăртнă: унăн полномочийĕсем кă-çалхи суйлавччен августăн 28-мĕшĕнче кăна вĕçленмеллеччĕ.
- Иккĕмĕш хут республика Пуçлăхĕн тивĕçĕсене пурнăçлама суйлава хутшăнма Раççей Президенчĕн тата суйлавçăсен шанăçĕ чи кирлĕ услови тесе шутлатăп, - пĕлтернĕ Михаил Игнатьев. - Эпĕ манăн отставкăна вăхăт çитмесĕрех йышăннăшăн тата суйланнă республика Пуçлăхĕ хăйĕн должноçне йышăниччен Чăваш Ен Пуçлăхĕн тивĕçĕсене вăхăтлăх пурнăçлама мана шаннăшăн Раççей Президентне тав тăватăп. Çак шанăç ман çине пысăк яваплăх тиет.
Чăваш Ен Пуçлăхĕн тивĕçĕсене вăхăтлăх пурнăçлани Пуçлăх тата республика Правительствин ĕçĕ çине нимĕнле витĕм те кỹменнине палăртнă Михаил Игнатьев:
- Республика Правительстви хăйĕн ĕçне Чăваш Енре пурăнакансемшĕн тăрăшса малтанхи пекех пурнăçласа пырĕ.
ЧР ПА пресс служби.