11 июня 2015 г.
RAEX рейтинг агентстви пĕрремĕш хут Раççейри чи лайăх 200 шкул рейтингне хатĕрленĕ. Вĕсен шутĕнче - выпускникĕсем çĕршыври ертсе пыракан аслă вĕренỹ заведенийĕсене ăнăçлă вĕренме кĕрекен шкулсем. 200 шкултан малти ретре тăраканнисем - Мускаври шкулсем.
Асăннă рейтинга Шупашкарти шкулсем те кĕни савăнтарать. 3-мĕш номерлĕ лицей - 51-мĕш вырăнта: кунта вĕреннĕ 35 шкул ачи аслă вĕренỹ заведенийĕсене тỹлевсĕр вĕренме кĕнĕ, 4-шĕ - олимпиада пĕтĕмлетĕвĕсемпе. 5-мĕш номерлĕ гимнази рейтингра 151-мĕш вырăнта: унăн 20 выпускникне институт-университетри бюджетлă вырăнсене йышăннă, пĕри олимпиада кăтартăвĕсемпе вĕренме кĕнĕ.
Палăртмалла, асăннă рейтинга хатĕрленĕ май Раççейри тăхăр пин шкулти 40 пин выпускник çинчен информаци пăхса тухнă. Çавăнпа та ку рейтинг çĕршыври шкулсенчи выпускниксем ертсе пыракан аслă вĕренỹ заведенийĕсене вĕренме кĕни пирки тĕрĕс информаци парать теме пулать.
А.ТИМОФЕЕВА.