11 июня 2015 г.
Май уйăхĕн 27-мĕшĕнче Чăваш Енрен Пушкăртстана, Константин Иванов çуралнă тăрăха, пысăк йыш тухса кайнă. Поэтăмăрăн юбилейне халалланă, Чăваш наци конгресĕ йĕркеленĕ çулçỹревре хĕрлĕчутайсем те пулнă.
Чăваш наци конгресĕн районти уйрăмĕн членĕ-сем - Светлана Яруткина, Николай Трифонов, Роберт Галимов, Зинаида Чернова, Галина Зотова, Валентина Степанова, Сергей Баринов, Римма Петрова, Андрей Кошатников - майăн 28-29-мĕшĕсенче Пушкăртстанра пулнă май Пелепей хулине, Слакпуç ялне çитсе курнă. Вĕсем Константин Ивановпа Яков Ухсайăн музейĕсенчи экспонатсемпе паллашнă, вĕсен вилтăприйĕ-сене çитсе курнă, ытти экскурсисенче пулнă. "Силпи-2015" концерт умĕн хĕрлĕчутайсем ытти хăнасемпе пĕрлех вăйă картине тăнă.
Çав кунсенче Слакпуç тĕрлĕ çĕрти чăвашсене пĕр çĕре пухнă. Акă Мишеркассинче çуралса ỹснĕ, хальхи вăхăтра Челябинскра пурăнакан Алек-сандр Герасимов Слакпуçне мăшăрĕпе Надежда Ильиничнăпа тата Сергей ывăлĕпе çитнĕ. Вĕсем - Челябинск облаçĕнчи чăвашсем йĕркеленĕ обществăлла организаци членĕсем. Сăмах май, Герасимовсем пирĕн хаçата тăтăшах çырăнса илсе вулаççĕ.
Слакпуçĕнчи тĕлпулăва пухăннисем кунта малашне те çĕршыври чăвашсене пухасси пирки калаçса татăлса уйрăлнă.
А.КАРПОВА.