17 июня 2015 г.
Акатуйра Июнĕн 13-мĕшĕнче Тюмень облаçĕнче чăваш наци уявĕ - Акатуй - иртнĕ. Ăна Тюмень облаçĕнчи чăвашсен "Тăван" обществăлла организацийĕ йĕркеленĕ.
Асăннă уява пирĕн районăн çичĕ çынран тăракан делегацийĕ хутшăннă. Тюмень çĕрĕ çинче икĕ кун хушши пулнă май вĕсем Акатуйăн савăнăçлă пайне хутшăнса аякри ентешсене ЧР культура министрĕ Вадим Ефимов тата район администрацийĕн пуçлăхĕ Александр Башкиров ячĕпе саламланă, парнесем панă. Концерт вăхăтĕнче вара пухăннисене хăйсен пултарулăхĕпе Чăваш Республикин тава тивĕçлĕ культура ĕçченĕ Александр Самсонов, Наталья тата Регина Чишкинасем, Ольгăпа Николай Пономаревсем савăнтарнă.
Иккĕмĕш кунне хĕрлĕчутайсем Тюмень облаçĕнчи паллă вырăнсене çитсе курнă, çав шутра - Иртыш юханшывĕ хĕрринчи Алафей тăвĕ патĕнчи чăваш сăмсахне.
А.ТИМОФЕЕВА.