01 июля 2015 г.
Июнĕн 27-мĕшĕнче Рязань хулинче савăнăçлă лару-тăрура салтак çулне çитмен çамрăксен Раççейри Спартакиади уçăлнă. Пысăк шайри ăмăртусенче тăван шкул, район тата Чăваш Республикин чысне Хĕрлĕ Чутай шкулĕнче вĕренекен 10 яш хỹтĕлет.
Эдуард Романов ертсе пыракан шкул ачисем Спартакиада программинче палăртнă ăмăртусен чылай тĕсĕнче хăйсен пултарулăхне кăтартнă та ĕнтĕ. Акă, Алексей Дадюков ишессипе хăйĕн рекордне çĕнетни паллă.
Паллах, çĕршыври 40 регионтан килсе çитнĕ 500 ытла çамрăк хушшинче ăмăртма пĕрре те çăмăл мар. Анчах та хĕрлĕчутайсем хăйсем кĕрнеклĕ те йăрăс пулнине, ишме те, чупма та, туртăнма та пултарнине, çар хатĕрленĕвне те алла илнине кăтартса парас тесе вăй-халне шеллемеççех. Ахальтен мар пулĕ вĕсем Рязань хулине кайиччен ăмăртусене кунсерен ир те каç çине тăрса хатĕрленчĕç. Эпир вĕсене шанатпăр, çĕнтерỹпе таврăнма ăнăçу сунатпăр.
Салтак çулне çитмен çамрăксен Раççейри Спартакиади паян вĕçленет.
А.ТИМОФЕЕВА.